Foto: gov.kz
Qysqa merzimdi kásiptik oqytý «Kásipkerlikti damytýdyń 2021-2025 jyldarǵa arnalǵan ulttyq jobasy» aıasynda júzege asyrylady. Oqý aıaqtalǵannan keıin jumyssyz azamattarǵa sertıfıkat tabystalady, jumys berýshiler olardy áleýmettik kelisimshart negizinde jumysqa ornalastyrýǵa mindettelgen.
Shymkent qalasy jumyspen qamtý jáne áleýmettik qorǵaý basqarmasynyń basshysy Balmarjan Narbekovanyń tóraǵalyǵymen ótken komıssııa otyrysynda oqý uıymdarynda túrli mamandyqtar boıynsha oqytyp, jumys kúshimen qamtamasyz etýdi ótingen 60-tan astam jumys berýshi mekemeniń talapqa sáıkestikteri saralanyp qaralǵan. Mekemelerden tehnıkalyq jáne kásiptik sala mamandaryna suranys kóp túsken.
Oqýǵa Shymkent qalasynda turaqty tirkeýde turǵan jumyssyz azamattar qatysa alady. Eger úmitkerdiń múgedektigi bolǵan jaǵdaıda, múgedektikti ońaltýdyń jeke baǵdarlamasynda (IPR) jumysqa qabilettiligine dárigerdiń ruqsatnama qujaty qajet.
Jalpy, kásiptik oqytý merzimi − 3 aı. Aı saıyn 20 948 teńge shákirtaqy jáne 6900 teńgeden bir rettik materıaldy kómek kórsetiledi.
