Qýanyshbek Esekeevtiń aıtýynsha, elimizdiń telekommýnıkasııa salasyndaǵy iri operatorynyń byltyrǵy osy kezeńmen salystyrǵandaǵy tabysy 10 paıyzǵa, al taza paıdasy 16 paıyzǵa ósken. 5G jelisin qurý – «Qazaqtelekom» úshin basymdyqtardyń biri sanalady. Bul bastama aıasynda 2027 jylǵa qaraı búkil el boıynsha 7 myńnan astam bazalyq stansııa salynýǵa tıis. Osy jyldyń sońyna deıin besinshi býyn jelisiniń 782 bazalyq stansııasyn salý josparlanyp otyr.
«Qoljetimdi ınternet» ulttyq jobasy aıasynda kompanııa 1200-ge jýyq aýyldy optıkalyq tehnologııalar arqyly ınternet jelisine qosýdy jáne respýblıkalyq avtojoldardy LTE tehnologııasy boıynsha sapaly ınternetpen qamtamasyz etýdi kózdep otyr.
Budan bólek, Memleket basshysyna Ázerbaıjanmen birlesken joba aıasynda Kaspıı teńiziniń tabany arqyly talshyqty-optıkalyq jeli salý jónindegi tapsyrmasynyń oryndalý barysy týraly baıandaldy.
Sonymen qatar «Qazaqtelekomǵa» baılanys sapasyna qatysty problemalardy sheshý jáne Qazaqstan qalalaryndaǵy keń jolaqty ınternet jelisimen qamtylmaǵan aımaqtardyń máselesin tezirek retke keltirý mindeti júkteldi. Qasym-Jomart Toqaev aýyldyq jerlerdegi halyqtyń qala turǵyndary sııaqty zamanaýı sıfrlyq qyzmetter men ónimderge qol jetkizýge tıis ekenin atap ótti. Osyǵan baılanysty kompanııaǵa tıisti ınfraqurylym qurylysynyń qarqynyn arttyrý tapsyryldy.
