Foto: www.gov.kz
Soltústik óńirleriniń arasyndaǵy kúzgi-dala jumystarynyń eń tómen qarqyny osy oblysta. Aýa raıynyń qolaısyzdyǵyna baılanysty barlyǵy 834,3 myń ga astyq nemese jalpy alańnyń 17% - y jınaldy.
Aýyl sharýashylyǵy mınıstri oblystyń úsh aýdanyn aralap, agroqurylymdardyń basshylarymen ózekti máseleler talqylady. Bıylǵy kúzdegi eki aptadan asa toqtaýsyz jaýǵan jańbyrdyń saldarynan dıqandar bıdaıdy jınaı almaı otyr. Dıqandar astyqtyń sapasyz bolyp, kelesi jyly tuqymsyz qalý qaýpi de joq emes deıdi. Olardy astyqty keptirý úshin áldeqaıda kóp otyn qajet etetin elevatorlardyń rentabeldiligi de alańdatady. Nesıelik mindettemeler men sýbsıdııalar da sharýalar úshin mańyzdy máseleniń biri. Aıdarbek Saparov dıqandardyń barlyq máseleleri jedel sheshiletinin aıtty.
«Memleket tarapynan qajetti qoldaý kórsetiledi. Barlyq qarjy ınstıtýttary nesıelik mindettemelerdi uzartý múmkindigin jeke qarastyrady. Astyqty keptirýge arnalǵan dızel otynynyń baǵasy men qosymsha kólemine keletin bolsaq, basqa memlekettik organdarmen kelisý prosesi aıaqtalyp jatyr. Lısenzııalanǵan astyq qabyldaý kásiporyndary men keptirgishteri bar fermerler úshin mindetti túrde arzandatylǵan otyn beriledi», dedi mınıstr.
Sharýalarmen kezdesýde Aqmola oblysynyń ákimi Marat Ahmetjanov barlyq sharalar qabyldanatynyn, óńirde egin jınaý naýqanyn ótkizý máseleleri boıynsha oblys ákiminiń orynbasary bastaǵan komıssııa qurylǵanyn málimdedi.
«Aqmola oblysyna sapary qarsańynda aýyl sharýashylyǵy mınıstri jedel shtab otyrysyn ótkizip, birqatar tapsyrma berdi. Onyń ishinde astyq qabyldaý kásiporyndarynyń qyzmetteri baǵasynyń ósýinsiz táýlik boıy jumys isteýin, astyqtyń sandyq-sapalyq sıpattamalaryn esepke alý úshin aýmaqtyq ınspeksııalar men karantındik qyzmetterdiń táýlik boıy jumys isteýin qamtamasyz etý bar. «Qazagroeks» AQ Azyq-túlik korporasııasyndaǵy qolda bar astyq qoryn zerttep, onyń tuqym materıaly retinde paıdalanýǵa jaramdylyǵyn tekseredi. 2024 jyly sebiletin tuqymdar bólek saqtalady. Oblys ákimdikteri sýbsıdııa alýǵa kelip túsken ótinishterdi qaraý úshin qosymsha mamandardy tartady. Sharýalar arasynda týyndaıtyn suraqtar men máselelerdi jedel sheshý úshin Aýyl sharýashylyǵy mınıstriniń tapsyrmasymen jumys toby qurylyp, Qostanaı oblysyna bardy. Keıin ýákiletti organdardyń ókilderi Soltústik Qazaqstan men Aqmola óńirine barýǵa tıis. Aýyl sharýashylyǵy mınıstrligi qabyldap jatqan sharalar qolaısyz aýa raıynyń saldaryn barynsha azaıtýǵa jáne Qazaqstan sharýalaryn qoldaýǵa múmkindik beredi. 9 qyrkúıektegi jedel málimetterge sáıkes, respýblıka boıynsha barlyǵy 5 mln gektar astyq jınaldy, bul jalpy egis alqabynyń 29,2%-yn quraıdy. Ortasha ónimdiligi 9,9 s/ga bolǵan kezde 5 mln tonna astyq bastyryldy», delingen habarlamada.
