El kóleminde atalyp jatqan Eńbek kúni aıasynda esik ashqan kórme tańǵajaıyp talant ıesiniń ómir belesterinen, shyǵarmashylyq jolynan habar beredi. Kórmeniń ashylý saltanatyna qatysqan qonaqtar Aıýhanovtyń ómirinen syr shertetin ár jyldardaǵy fotomaterıaldarmen, óner ıesiniń tirshiliginde tutynǵan zattarymen, marapattary jáne ǵylymı eńbekterimen tanysty.
Kórme ekspozısııasynyń eleýli bóligine bıshiniń túrli qoıylymdarda kıgen sahnalyq kostıýmderi qoıylǵan. Olardyń qatarynda Bolat Aıýhanovtyń ustazy, Qazaq KSR halyq ártisi A.V. Seleznevqa tıesili bolǵan, keıinnen B. Aıýhanovqa syıǵa berilgen sahnalyq kıim kelýshilerdiń zor qyzyǵýshylyǵyn týdyrary sózsiz. Sondaı-aq, «Jas balet» teatrynda Kýba bıine arnaıy tigilgen kostıým (1965 j.), Iаn Sıbelıýstyń mýzykasyna jazylǵan «Muńly vals» klassıkalyq bıine kıgen kaletasy jáne «Gamlet» baletindegi óziniń súıikti partııasyn oryndaǵanda kıgen kostıými de kórme tórinen oryn alǵan.
Aıtýly sharany ashqan Memlekettik ortalyq mýzeı dırektory Rashıda Harıpova taǵdyr bergen talantyn el mádenıetin órkendetýge arnaǵan aıtýly tulǵanyń aıshyqty muralary keıingi urpaq úshin ólmes ónege ekenin atady.
«Memleket basshysynyń bastamasymen elimizde Eńbek kúni erekshe mánde atalyp ótti. Eńbek adamdary qaı kezde de qoǵamdy alǵa súıreıtin qýatty kúsh. Eńbek adamdary qaı kezde de súıkimdi. Osyny alǵa ustaǵan Prezıdentimiz: «Adal azamatqa tán eńbekqorlyq, iskerlik, jaýapkershilik, bilimpazdyq jáne jaqsydan úırený, jamannan jırený syndy asyl qasıettiń bári shynaıy eńbek adamynyń boıynan tabylady. Sondyqtan óz isiniń maıtalmandary qashanda qoǵamnyń nazarynda bolýǵa tıis. Al, jastarymyz solarǵa qarap boı túzeýi kerek» degen bolatyn. Ult mádenıetine adal eńbek etip, sanaly ǵumyryn urpaq tárbıesine arnaǵan Bolat Ǵazızuly shyn máninde halqymyzdyń maqtanyshy. Búgingi kórme bir jaǵynan ǵajaıyp óner ıesiniń ǵıbratty jolyn úlgi etýge arnalsa, ekinshi jaǵynan eńbek adamyna qurmet retinde uıymdastyrylyp otyr», deıdi Rashıda Harıpova.
Kórme Qazaqstan Respýblıkasy Memlekettik ortalyq mýzeıi qoryndaǵy Bolat Aıýhanovtyń jeke kesheninen jáne Qazaqstan Respýblıkasy Memlekettik akademııalyq bı teatrynan alynǵan materıaldar negizinde jasaqtalǵan. 
Bolat Ǵazızuly Aıýhanov 1938 jyly 13 qyrkúıekte Semeı qalasynda dúnıege kelgen. 1955 j. Almaty horeografııa ýchılıshesin, 1964 j. A.V. Lýnacharskıı atyndaǵy Máskeý teatr óneri ınstıtýtynyń baletmeısterlik fakýltetin támamdaǵan. Alǵashqy eńbek jolyn 1957 j. Abaı atyndaǵy Qazaq Memlekettik akademııalyq opera jáne balet teatrynda balet ártisi bolyp bastaǵan. 1964 j. bastap Abaı atyndaǵy Qazaq memlekettik akademııalyq opera jáne balet teatrynda baletmeıster, 1965 jyldan «Qazaqkonsert» eki akterli Teatrynyń balet solısi, al 1967 jyldan «Qazaqkonsert» janyndaǵy Almaty Jastar baleti kórkemdik jetekshisi, balet solısi boldy. 1975 j. Qazaqstan klassıkalyq bı Ansambliniń kórkemdik jetekshisi, keıinnen dırektory qyzmetin atqardy. 1991 j. Qazaq memlekettik klassıkalyq bı ansambliniń kórkemdik jetekshisi, 2003 jyldan ómiriniń sońyna deıin ózi negizin qalaǵan QR Memlekettik akademııalyq bı teatrynyń dırektory boldy.
ALMATY
