Foto: Ashyq derekkóz
Mınıstrliktiń málimetinshe, 9,5 mln aýyl sharýashylyǵy daqyldary, onyń ishinde 6,9 mln tonna bıdaı orylǵan.
«Bıylǵy vegetasııalyq kezeńde fermerler birqatar qıyndyqqa tap boldy. Ońtústik óńirlerde qurǵaqshylyq boldy, al soltústiginde jańbyr jaýdy. Bul eginniń jaı-kúıine jáne jınalǵan daqyldyń sapasyna keri áser etti. Aýa raıynyń qolaısyzdyǵyna qaramastan, astyqtyń kútiletin ónimi Qazaqstandy nan, un jáne makaron ónimderimen tolyq qamtamasyz etýge jetkilikti bolady. Elimizde ótken jylǵy joǵary sapaly astyqtyń mol qory bar. О́nimdiliktiń tómendeýine baılanysty eksporttyq áleýet tómendeıdi, alaıda respýblıka dástúrli eksporttyq naryqtardaǵy óz pozısııasyn saqtaıdy», delingen vedomstvo málimetinde.
1-shi surypty unnan jasalǵan bıdaı nanynyń baǵasyn turaqtandyrý úshin Azyq-túlik korporasııasy ishki naryqty retteý qyzmeti arqyly azyq-túlik astyǵyn satady. Bul mehanızm alǵash ret ótken jyly qoldanylǵan bolatyn. Bıyl da jalǵasady. Nátıjesinde nan pisirý kásiporyndary shıkizatpen qamtamasyz etilip, nan otandyq naryqqa belgilengen baǵamen shyǵady.
Qazir mańyzdy mindet – fermerlerge qajetti qoldaý kórsetý. Atap aıtqanda, astyqty keptirý úshin jeńildetilgen dızel otynyn bólý máselesi pysyqtaldy. Oblystardyń astyq keptirýge arnalǵan otynǵa jalpy qajettiligi 73 myń tonna. Onyń 19 myń tonnasyn qolda bar rezerv esebinen jabý josparlanyp otyr.
Barlyq astyq qabyldaý kásiporyndarynyń astyqty qabyldaýǵa daıyndyǵy qaıta tekserildi. Olardyń táýlik boıy jumys isteýin qamtamasyz etý tapsyryldy. Ákimdikter astyq keptirý qyzmetiniń baǵalaryn kótermeý máselesin baqylaýǵa aldy, tarıfterdi negizsiz kóterý faktileri anyqtalsa tıisti sharalar qabyldanady. Respýblıka boıynsha astyqty saqtaýdyń jalpy syıymdylyǵy 29,9 mln tonnany quraıdy.
Sondaı-aq fermerler úshin aıyppul sanksııalaryn qoldanbaı nesıelerdi tóleý merzimin uzartý máseleleri jeke pysyqtalyp jatyr, bul bolashaqta olardyń nesıe tarıhynyń buzylmaýyna múmkindik beredi.
Azyq-túlik korporasııasy qolda bar astyq qorynyń tuqym retinde paıdalaný jaramdylyǵyna saraptama jasaýdy bastady. Parametrlerge sáıkes keletin astyq bólek jınalady. Oblystardyń ótinimderi boıynsha mundaı astyq tuqymdary egin egetin fermerlerge taýarlyq kredıt retinde beriledi.
О́z kezeginde, jospar boıynsha 1,9 mln tonna astyq tuqymy qajet bolsa, qazir onyń 695,4 myń tonnasy nemese 35%-y jınaldy. Sońǵy jyldardaǵy taldaý kórsetkendeı, egilgen tuqymnyń shamamen 60%-y otandyq úleske tıesili.
