Eýrohattama boıynsha kólik ıeleri polısııanyń qatysýynsyz nemese sotqa júginbeı-aq, biraq belgili bir sharttardy saqtaı otyryp, jeńil jol-kólik oqıǵalardyń saldarynan kólikteriniń zaqymdanýy úshin saqtandyrý tólemderin ala alady.
Sonymen qatar jol-kólik oqıǵasyna qatysýshylardyń arasyndaǵy kelispeýshiliktiń aldyn alyp, olar apatqa kimniń kináli ekenin kelise otyryp sheshý kerek. Keltirilgen shyǵyn mólsheri árbir JKO-ǵa qatysýshy úshin 100 AEK-ten aspaýy kerek. 2024 jyldyń 1 qańtarynan bastap bul 369 myń teńgeni quraıdy. Saqtandyrý jaǵdaıyn retteýdiń ońaılatylǵan tártibi boıynsha saqtandyrý tólemin iske asyrǵannan keıin saqtandyrýshyǵa árbir jeke saqtandyrý jaǵdaıy boıynsha kórsetilgen somanyń shekti mólsherinen asatyn zalaldardy óteý týraly qosymsha talaptardy qoıýǵa quqyǵy joq.
Jáne taǵy bir keleli másele – úshinshi tulǵalardyń densaýlyǵy men múlkine zııan keltirmeý. Iаǵnı Eýrohattamany jol-kólik oqıǵasynyń eki qatysýshysy ǵana paıdalana alady. Eger basqa adamdar nemese basqa kólikter zardap shekken bolsa, onda bul jeńildetilgen tártip apatqa qatysýshylarǵa qoldanylmaıdy. Qazirgi ýaqytta «Eýrohattama» mobıldi qosymshasy synaqtan ótýde, onyń kómegimen bıometrııalyq sáıkestendirý arqyly saqtandyrý uıymyna sıfrlyq qujattardy, fotosýretter men beınejazbalardy qosý arqyly ótinish berýge bolady. Odan keıingi kezeńde qosymshany qanatqaqty rejimde testileý ótedi, ol osy jyldyń sońyna deıin jalǵasady.
«Uıaly telefondy paıdalana otyryp, kólik ıeleri qujattardy daıyndaıdy, eki tarap boıynsha kelisilgen shartqa sáıkes deklarasııa jasalady, saqtandyrý oqıǵasy tirkelgen jerge fotomaterıaldar qosa tirkeledi. Jol-kólik oqıǵasyna qatysýshylar saqtandyrýshydan deklarasııany qabyldaǵany týraly habarlama alǵansha oqıǵa ornynan ketpeýi kerek. Deklarasııaǵa qosa berilgen fotomaterıaldar arqyly avtokóliktiń markisi, modeli, sáıkestendirý nómiri, memlekettik tirkeý nómiri, sondaı-aq kólik quraldaryna keltirilgen zııannyń mán-jaılary, kólik quraldaryna kórinetin zaqymdardyń sıpaty men tizbesi anyqtalmasa, jol-kólik oqıǵasy bolǵan jaǵdaıda saqtandyrýshy kólik ıelerinen fotomaterıaldardy qaıta jiberýdi talap etýge quqyly», dedi Freedom Insurance basqarma tóraǵasy Azamat Kerimbaev.
«Eýrohattamanyń» artyqshylyqtary qandaı? Birinshisi – tólem merzimin qysqartý. Eger ortasha tólem 92 kún bolsa, endi ol 6 jumys kúni bolady. Ekinshisi – jol polısııasy men sotqa túsetin salmaqty azaıtý. Bul – kólik keptelisin jeńildetedi. Qazaqstan Respýblıkasy Ishki ister mınıstrliginiń málimeti boıynsha, Qazaqstanda orta eseppen jeńil jol-kólik oqıǵalarynyń sany jalpy JKO sanynyń shamamen 40%-yn quraıdy. 2022 jyly elimizdiń joldarynda 100 myńnan astam jol-kólik oqıǵasy tirkeldi. Úshinshi artyqshylyq – saqtandyrýǵa degen senimniń artýy, óıtkeni jańa qyzmetti engizý saqtandyrý tólemderi prosedýrasynyń baqylaýy men ashyqtyǵyn qamtamasyz etedi. Osylaısha, «Eýrohattama» úderisti aıtarlyqtaı jeńildetedi jáne saqtandyrý tólemderin alýǵa ketetin ýaqytty qysqartady, sondaı-aq kólik keptelisin azaıtady.
«Retteýshi árbir saqtandyrý uıymyna óziniń uıaly baılanys qyzmetin qurýǵa jaǵdaı jasady. Osylaısha, bul saladaǵy monopolııany joıdy», dep atap ótti Azamat Kerimbaev, ári Freedom Insurance 2022 jyldan bastap DTP.kz onlaın-tólemder servısin engizip, jumys istep turǵanyn aıtty.
DTP.kz – kólik ıeleri saqtandyrý tólemin birneshe kún ishinde onlaın ala alatyn arnaıy sıfrlyq platforma. Ol úshin dtp.kz saıtyna kirip, jeke kabınet ashyp, ótinish berý kerek. Ári qaraı, nusqaýlardy oryndaı otyryp, apat ornynda eki kólikti de (sizdiki jáne jol-kólik oqıǵasyna jaýapty) ártúrli buryshtan, sondaı-aq kóligińizdiń VIN-kodyn sýretke túsirý kerek. О́tinishke tómendegi qujattardy tirkeý qajet: jeke kýálik, júrgizýshi kýáligi jáne kólik quralyn tirkeý kýáligi. Muny «Sıfrlyq qujattar» memlekettik portaly arqyly jasaýǵa bolady. Ári qaraı hattamanyń fotosýretin, jol-kólik oqıǵasynyń syzbasyn, túsindirme jazbasyn qosyp, elektrondy ótinishke qol qoıý kerek. Birneshe ret basý jáne durys toltyrylǵan jaǵdaıda saqtandyrý tólemi 1-7 kún ishinde kólik ıesiniń kartasyna jiberiledi.
«Zamanaýı tehnologııalar men saqtandyrý sektoryn sıfrlandyrý boıynsha retteýshiniń júrgizip jatqan jumysynyń arqasynda biz Dtp.kz kúrdeli jaǵdaılarǵa arnalǵan biregeı servısin qurdyq. О́temaqy alýdyń barlyq úderisi klıentterimizge qoljetimdi bolý úshin barynsha qysqa merzimde jáne óte yńǵaıly sıfrlyq formatta júzege asady», dep túıindedi A.Kerimbaev.
Aıtpaqshy, jol-kólik apatyna ushyraǵan jaǵdaıda kólik ıeleri 5777 biryńǵaı baılanys ortalyǵynyń nómirine qońyraý shala alady. Bul nómirge uıaly telefon arqyly baılanysý – tegin.
