«Eshkim mundaı oqys jaǵdaıdy kútken joq. Ol dopty aınaldyryp jattyǵyp júrgen. Aıaq astynan esinen tanyp qulapty. Muny jattyqtyrýshy aıtty. Fýtbol alańynda buryn-sońdy dál osyndaı qaıǵyly oqıǵan oryn almaǵan», – deıdi «Qyzyljar» fýtbol ortalyǵynyń basshysy Vıacheslav Koloda.
Oqys oqıǵa fýtbol klýbynyń kezekti jattyǵýy kezinde bolǵan. Raýan Muhtarov doppen oınap kele júrip, kenetten qulap túskeni sol jerdegi beınebaqylaý kameralaryna túsip qalǵan.
Qazir osy beınejazba tergeýshilerdiń qolynda. Sondaı-aq, kameraǵa Raýannyń keýdesine dop tıgeni de túsip qalǵan. Biraq jas sportshy esh aýyrsynbaı ári oınap kete barǵan. Degenmen onyń ólimine osy soqqy sebep bolýy múmkin degen boljam bar.
Fýtbolshynyń naqty neden kóz jumǵany áli anyqtalyp jatyr.
«QR Qylmystyq Kodeksiniń 001-baby «Adamnyń qaıtys bolýy» boıynsha sotqa deıingi tergep tekserýdiń biryńǵaı tizilimine tirkeldi. Sot medısınalyq saraptama taǵaıyndaldy. Istiń barlyq mán- jaıyn zerdeleýge baǵyttalǵan sotqa deıingi tergeý júrip jatyr», – deıdi SQO polısııa departamenti baspasóz qzmetiniń resmı ókili Nurbek Baekın.
