«Zeınetkerlerge laıyqty ári jaqsy zeınetaqy tóleý – el turǵyndaryn qorǵaý elementi. Elderdegi zeınetaqy mólsheri negizinde sol eldiń ekonomıkalyq damý deńgeıin, demografııalyq jaǵdaıdy jáne áleýmettik saladaǵy memlekettik saıasatty anyqtaýǵa bolady. Qarapaıym halyqtyń ál-aýqaty qanshalyqty jaqsaryp jatqany memlekettik járdemaqylar mólsheriniń artýynan baıqalady. Qazaqstanda 30 jyl ishinde áleýmettik sala boıynsha sheshimin tappaǵan eń basty másele – halyqtyń áleýmettik jaǵdaıynyń tómendigi. Elimiz baı bolsa da, áleýmettik qoldaýdy qajet etetin az qamtylǵan halyq sany jyl saıyn artyp otyr. Shyn máninde, 30 jylda eń tómengi jalaqy men zeınetaqyny mise tutyp kelemiz. Bul halyqtyń qaryzǵa kirip, nesıeniń quryǵyna túsýge ıtermeleıdi. Memleket belgilegen eń tómengi zeınetaqy mólsheri – 57 853 teńgege ómir súrý múmkin emes», dedi depýtat Úkimet basshysynyń orynbasary Tamara Dúısenovanyń atyna joldaǵan depýtattyq saýalynda.
Aıtýynsha, eldegi zeınetaqy júıesin qaıta jańǵyrtý kerek.
«Bul rette eń az zeınetaqy alatyn zeınetkerlerdiń zeınetaqysyn kóbeıtýdiń mańyzy zor. Zeınetaqynyń eń tómengi bazalyq mólsherlemesin eń tómengi jalaqy mólsherimen teńestirý qajet. Zeınetaqy júıesindegi tıimdi ózgerister – zeınetkerlerdiń áleýmettik jaǵdaıynyń, ómir súrý sapasynyń az da bolsa artýynyń birden-bir kórsetkishi. Bizdiń elde zeınetkerdiń eń tómengi zeınetaqysy dári-dármek pen durys demalýdy aıtpaǵanda, tamaǵyna áreń jetedi. Bıyl eń tómengi jalaqy 70 myń teńgege kóterilse, kelesi jyly 85 myń teńgege deıin jetkizý mindeti qoıyldy. Al, osy eń tómengi jalaqy mólsheri eń tómengi kúnkóris deńgeıin eskere otyryp bekitiledi. Sondyqtan zeınetaqynyń eń tómengi mólsherlemesin eń tómengi jalaqymen teńestirý – Úkimet aldyndaǵy kezek kúttirmeıtin ózekti máselelerdiń biri bolýy qajet dep esepteımin», dedi Ádil Jubanov.
Sonymen qatar ol memleket azamattardyń eń tómengi jalaqy deńgeıinen tómen emes zeınetaqy alýyna kepildik berýi qajettigin alǵa tartty.
«Álemniń keıbir elderinde adamnyń zeınetaqysy belgilengen eń tómengi mólsherden tómen bolsa, onda mundaı zeınetkerge áleýmettik ústemeaqy tóleý tájirıbesi bar. Eń tómengi zeınetaqyny alatyn kim degen suraq týyndaıdy? Ol – eńbeq ótili joq, zeınetaqy qoryna aqshasy salynbaǵan adam. Ondaı adamdar kóbine aýyldyq jerdiń turǵyndary. Aýyl turǵynynda eńbek ótili qaıdan bolady, eger sol kezdegi memleket basshysy jasap turǵan sovhozdar men kolhozdardy kúshpen taratyp, endi biz etti Brazılııa, Argentınadan alamyz dese? Sondyqtan halyqtyń osyndaı jaǵdaıǵa tap bolǵanyna bıliktiń de kinási zor», - dedi ol.
