Foto: Memlekettik basqarý akademııasy
EAPAA (European Association for Public Administration Accreditation) akkredıtasııasy – memlekettik basqarý salasyndaǵy oqytý baǵdarlamalaryna arnalǵan álemdegi eń bedeldi akkredıtteý qaýymdastyqtarynyń biri.
Rektor Erlan Ábildiń aıtýynsha, EAPAA-nyń Akademııa bilim berý baǵdarlamalaryn halyqaralyq deńgeıde tanýy Akademııaǵa akkredıttelgen joǵary oqý oryndarymen birlesken qos dıplomdy bilim berý baǵdarlamalaryn ázirleý jáne iske asyrý, birlesken ǵylymı zertteýler júrgizý maqsatynda yntymaqtastyq ornatýǵa múmkindik beredi.
«Bilim baǵdarlamalaryn iske asyratyn Akademııa sapany qamtamasyz etýdiń barlyq standarty boıynsha ózin-ózi baǵalaý týraly esepterdi daıyndap, olardy rastaıtyn qosymshalarymen birge tehnıkalyq saraptamaǵa jiberdi. 2022 jylǵy 20-24 qarasha aralyǵynda saraptamalyq top aýdıt júrgizdi. Toptyń aýdıt júrgizý baǵdarlamasyna sáıkes Akademııanyń basshylyǵymen, professor-oqytýshylar quramymen jáne qurylymdyq bólimsheleriniń qyzmetkerlerimen suhbat júrgizildi. Akkredıtteletin bilim berý baǵdarlamalarynyń materıaldyq-tehnıkalyq bazasy da tekseristen ótti. Aqparatty tolyq rastaý úshin akkredıtteletin bilim berý baǵdarlamalary (jalpy negizgi kýrstar) boıynsha oqıtyn bilim alýshylarmen jáne professor-oqytýshylar quramymen suhbat júrgizildi», dedi Memlekettik basqarý akademııasynyń rektory.
Akkredıtteýden «Memlekettik basqarý» (Public Administration), «Ekonomıka» (Economics), «Memlekettik saıasat» (Public Policy), «Halyqaralyq qatynastar» (International Relations) syndy bilim baǵdarlamalary ótti.
Akademııanyń táýelsiz halyqaralyq akkredıtteý rásiminen ótýdegi basty maqsaty – iske asyrylyp jatqan bilim berý baǵdarlamalarynyń sapa deńgeıin rastaý, professor-oqytýshylar quramynyń kásibıligin baǵalaý, ESG halyqaralyq standarttaryna saı bolý jáne túlekterdiń eńbek naryǵyndaǵy básekege qabilettiligin rastaý.
