Foto: informburo.kz
«Mundaı ózgerister «G4 city» jobasynyń júzege asýy úshin jasalyp otyr. Biz aýyldyq okrýg turǵyndaryna áleýmettik jáne ákimshilik qyzmetter kórsetýdi ary qaraı jalǵastyra beremiz. Onyń ústine, qazirgi tańda kóptegen memlekettik qyzmetterdi elektrondy úkimet portaly arqyly alýǵa bolady. Balalardy balabaqshaǵa kezekke qoıý, mektepke oqýǵa berý – barlyǵy elektrondy formada retteledi. Aýyl halqynyń tynys-tirshiligi únemi nazarda», dedi Nurlan Qumataev.
Budan bólek, Qonaev qalalyq kópsalaly aýrýhanasynyń dırektory Aıman Rakısheva aldaǵy ýaqytta eldi meken jurty Ile aýdany О́tegen batyr kentindegi medısınalyq mekemede em qabyldaıdy degen pikirdi teriske shyǵardy.
«Zarechnyı aýyldyq okrýginiń turǵyndary bizdiń aýrýhanada emdeledi. Sondaı-aq aýylda dárigerlik ambýlatorııa bar ekenin esten shyǵarmaǵanymyz jón. Bizge júgingen ár naýqasqa tolyqqandy medısınalyq kómek kórsetiledi», dedi aýrýhana basshysy.
Esterińizge sala keteıik, 31 qazan kúni qalalyq máslıhattyń kezekten tys HIII sessııasy ótti. Jıynda Qonaev qalasy men Almaty oblysyndaǵy aýyldyq okrýgterdiń shekarasyn ózgertý týraly másele qaraldy.
