Bıyl 15 qarasha kúni tól valıýtamyzǵa 30 jyl tolady. Ár eldiń ulttyq valıýtasy – táýelsizdik pen egemendiktiń belgisi, memlekettegi aqsha júıesiniń negizi.
«Teńgege 30 jyl» kolleksııalyq monetalary kúmisten jasalǵan, synamasy – 925/1000, ón boıynda tantal metall da bar. Moneta dıametri – 50 mm, daıyndaý sapasy – proof, nomınaly – 1 000 teńgelik, taralymy – 300 (úsh júz) dana. Monetanyń jalpy massasy – 84,32 gramm.
«Teńgege 30 jyl» monetasynyń dızaıny sıfrlyq tehnologııalardy damytý turǵysynan «₸» teńge belgisin paıdalanýǵa negizdelgen. Belginiń sol jaǵyndaǵy oıý-órnek damý men órkendeýdi, sondaı-aq ulttyq bolmys pen naqyshty bildiredi.
Kolleksııalyq monetalar Qazaqstan Teńge saraıynda daıyndaldy.
Bul monetalar Qazaqstan Respýblıkasynyń búkil aýmaǵynda ózderiniń belgilengen qunyna saı tólemniń barlyq túri boıynsha qabyldanýǵa, sondaı-aq eldiń barlyq bankinde bank shottaryna esepke alynýǵa, aýdarýǵa, usaqtalýǵa jáne aıyrbastalýǵa jatady.
Paıdalanýshy úshin «Qazaqstan monetalary» mobıldi qosymshasy da jumys isteıdi. Onda monetalarǵa qysqasha sıpattama berilip, serııalar boıynsha taqyryptyq bólimderge bólingen. Iаǵnı Ulttyq bank shyǵaratyn monetalar týraly aqparatpen tolyqtaı qamtylǵan. Jekelegen monetalar boıynsha beınerolıkterge, monetalardyń 3D-sýretterine, sondaı-aq tolyqtyrylǵan shynaıylyq elementterine de siltemeler berilgen.
Monetalardyń satýǵa shyǵarylatyn kúni Ulttyq banktiń resmı saıtynda jáne áleýmettik jelilerdegi paraqshalarynda qosymsha habarlanady.
