2022 jyly Qazaqstan men Qytaı arasyndaǵy temirjol júk tasymaly 23 mln tonnadan artyp, tarıhı maksımýmnan asty. 2023 jyldyń basynan beri atalǵan kórsetkish taǵy 22%-ǵa ósti. Mundaı jaǵdaıda negizgi halyqaralyq baǵyttardyń qıylysynda ornalasqan Almaty temirjol torabyna júkteme artyp otyr. Osy rette jańa jobany iske asyrý Almaty stansasyn aınalyp ótetin «Jetigen – Qazybek bek» jańa temirjolyna júk aǵynyn qaıta baǵyttaýǵa múmkindik beredi. Jalpy, bul jeli Almaty torabyndaǵy júktemeni 40%-ǵa azaıtyp, júk jetkizý ýaqytyn edáýir qysqartady.
Temirjol jelisi qurylysyn bastaý rásimine qatysqan Premer-mınıstr Álıhan Smaıylov «Altynkól-Qorǵas» shekaralyq ótkelindegi temirjol baǵytynda keıingi jyldary ósim qarqyn alǵanyn atap ótti.
«Atalǵan tranzıttik dálizde Almaty temirjol toraby Shý, Aqtoǵaı, Altynkól, Almaty-2 baǵyttary boıynsha poıyzdar qozǵalysyn qamtamasyz etedi. Jobany iske asyrý júkterdi jetkizý merzimin 2 esege qysqartady», dedi Premer-mınıstr.
Ol sondaı-aq jobany júzege asyrý barysynda otandyq ónim úlesi keminde 85% bolatynyn aıtty. Qurylys kezinde 1 400 adam jumyspen qamtylyp, jeli iske qosylǵanda shamamen 500 adamǵa turaqty jumys orny ashylady.
«Shpal, relster men transformatorlar shyǵarýdy, ınertti materıaldar, qum jáne qıyrshyq tastardy jetkizýdi jergilikti kompanııalar júzege asyrady», dedi Álıhan Smaıylov.
Jalpy qurylys barysynda 130 shaqyrym temirjol tóseledi, 3 stansa, 13 kópir, 5 temirjol jáne 1 avtokólik ótkeli salynady.
Resmı is-sharada qurmetti temirjolshy, eńbek ardageri Qaltaı Sámbetov sóz sóıledi.
«Jetigen – Qazybek bek» beketteriniń arasynda temirjolshylar kópten kútken jol qurylysy bastaldy. Bul joldyń mańyzy zor, óıtkeni ol el ekonomıkasynyń damýyna, ósip-órkendeýine yqpal etedi. Atalǵan temirjol baǵyty Qazaqstan men Qytaı, Ortalyq Azııa men Reseı arasyndaǵy tranzıttik múmkindikterdi edáýir arttyrady», dedi ol.
Otandyq ónimniń úzdiksiz eksporttalýyn qamtamasyz etý jáne júk tranzıtin arttyrý maqsatynda elimizde temirjol ınfraqurylymyn damytý jumysy qarqyndy júrip jatqanyn aıta ketken jón. Atap aıtqanda, ótkizý qabiletin arttyrý úshin «Dostyq – Moıynty» ýchaskesinde ekinshi joldar salynyp jatyr. Jaqyn arada Qytaımen úshinshi halyqaralyq túıisý núktesine shyǵatyn «Darbaza – Maqtaaral» jáne «Baqty – Aıagóz» temirjol jelileriniń qurylysyn bastaý josparlanyp otyr. Úsh jyl ishinde barlyǵy 1300 shaqyrymnan astam temirjol salynady.
«Búgin biz Almaty torabyn aınalyp ótetin temirjol jelisiniń qurylysyn bastaımyz. Ol Ortalyq Azııaǵa, Eýropaǵa jáne Kaspıı teńizi porttaryna baǵyttalǵan tranzıttik júkterdiń ótýin jyldamdatady. Bul jeli sońǵy ýaqytta qarqyndy damyp kele jatqan Almaty torabyn jeńildetý úshin óte qajet. Ásirese, Almatynyń mańy, ónerkásip damyp keledi. О́tkizý qabiletin qajet etetin kólik-logıstıkalyq ortalyqtar da salynyp jatyr», dedi «QTJ» UK» AQ Basqarma tóraǵasynyń orynbasary Qanat Álmaǵambetov.
Onyń aıtýynsha, búgin Almaty torabyna keletin júk 1,5-2 táýlikke keshigip jatyr. Alaıda jańa temirjol jelisiniń arqasynda toraptyń jumysy aıtarlyqtaı jaqsarady.
«Meniń oıymsha, munda qyzmet kórsetiletin barlyq júk jóneltýshiler men júk alýshylar muny birden sezinedi. Bul jumys Prezıdenttiń elimizdiń kólik-logıstıkalyq múmkindikterin damytýǵa qatysty tapsyrmalaryn iske asyrý sheńberinde júrgizilip otyr. Búginde respýblıkada júkterdi jedel ótkizý úshin shyn máninde qolaıly jaǵdaılar jasala bastady», dedi ol.
