Basqosýdyń ashylýynda Túrki Akademııasynyń prezıdenti Shahın Mustafaev, Túrkııanyń Qazaqstandaǵy Tótenshe jáne ókiletti elshisi Mustafa Kapýdjý, L.Gýmılev atyndaǵy Eýrazııa ulttyq ýnıversıteti Basqarma múshesi – Ǵylym, kommersııalandyrý jáne ınternasıonaldandyrý jónindegi prorektory Janna Qurmanǵalıeva, QR Syrtqy ister mınıstrliginiń Erekshe tapsyrmalar jónindegi elshisi Ońtalap Ońalbekuly, Túrik tarıhy qoǵamynyń qurmetti múshesi, Halyqaralyq Osmanly zertteýleri komıtetiniń Basqarma keńesiniń múshesi professor Ilber Ortaıly, N.Nazarbaev ýnıversıtetiniń Qazaq tili jáne túrkitaný kafedrasynyń meńgerýshisi Iýlaı Shamıloǵlý sóz sóıledi. Sonymen qatar konferensııa jumysyna dılomatııalyq mıssııa qyzmetkerleri, qoǵam jáne memleket qaıratkerleri, zııaly qaýym ókilderi men túrkolog-ǵalymdar qatysty.
Jıynda sóz alǵan Akademııa basshysy Sh.Mýstafaev Túrkııa Respýblıkasynyń 100 jyldyǵy mańyzdy tarıhı beles ekenine toqtalyp, búginde Túrki yntymaqtastyǵy aıasynda baýyrlastyq baılanystaryn nyǵaıta túsken tamyrlas memleketter úshin úlken múmkindikter ashylǵanyn aıtty.
«Túrki áleminiń geosaıasat pen geoekonomıka turǵysynan mańyzy birte-birte artyp keledi. Turaqsyzdyq kúsheıip jatqan alasapyran álemde Túrki áleminiń beıbitshilik pen órkendeý aımaǵyna aınalý múmkindigi óte joǵary. Aldaǵy kezeńde Túrki áleminiń ózara kelisimge berik, baýyrlastyq baılanysqa bekem, myzǵymas dostyq qatynasqa negizdelgen, qaýipsizdik pen turaqtylyq saqtalǵan aımaq bolýyn tileımiz», dedi Sh. Mustafaev.
О́z kezeginde Túrkııa Respýblıkasynyń Qazaqstan Respýblıkasyndaǵy Tótenshe jáne ókiletti elshisi Mustafa Kapýdjý bıyl 3 qarashada Astanada ótken Túrki memleketteri uıymynyń mereıtoılyq H sammıtiniń joǵary deńgeıde ótkenin jáne basqosý yntymaqtastyqtyń jańa kezeńine betburys bolǵanyn atap ótti. Sonymen qatar elshi Túrkııanyń 100 jyldyǵyna arnalǵan atalǵan is-sharany uıymdastyrǵan Túrki Akademııasy men L.Gýmılev atyndaǵy Eýrazııa ulttyq ýnıversıtetine alǵysyn bildirdi.
Syrtqy ister mınıstrliginiń Erekshe tapsyrmalar jónindegi elshisi Ońtalap Ońalbekuly Túrkııa jurtshylyǵyn ǵasyrlyq mereıtoıymen quttyqtaı kele, Túrkııanyń jetistikteri — búkil Túrki áleminiń maqtanyshy ekenine toqtaldy.
Konferensııanyń qurmetti qonaǵy Ilber Ortaıly Túrki halyqtary arasynda mádenı baılanysty tereńdetýdiń mańyzdylyǵyna, ıntegrasııany nyǵaıtý barysynda mádenı yntymaqtastyqtyń mańyzy zor ekenine toqtaldy.
Jıyn aıasynda Túrki Akademııasy belgili túrik tarıhshysy Afet Inannyń «Kemal Atatúrikti eske alǵanda» atty kitabynyń tusaýkeser rásimi ótti. Jańa kitapta túrik zııaly qaýymynyń kórnekti ókili Afet Inan hanymnyń túrki áleminiń uly qaıratkeri, Túrkııa Respýblıkasynyń negizin qalaýshy Mustafa Kemal Atatúrik týraly estelikteri men oılary jınaqtalǵan. Aıta ketý kerek, kitapty Akademııa tuńǵysh ret qazaq tiline aýdaryp jaryqqa shyǵaryp otyr.
Budan keıin Túrkııadan arnaıy kelgen professor I.Ortaılynyń túrik tarıhyn zertteý baǵyttary boıynsha leksııasy ótti.
Konferensııa sońynda professor Ilber Ortaılyǵa Túrki áleminiń yntymaqtastyǵyn arttyrýdaǵy úlesi úshin Túrki Akademııasynyń arnaıy medali tabystalyp, L.Gýmılev atyndaǵy ENÝ ýnıversıtiniń Qurmetti profesory ataǵy berildi.
