«Qazaqstan halqynyń sany 20 mıllıonǵa jetti» degen qýanyshty habardy Ulttyq statıstıka bıýrosy, Densaýlyq saqtaý mınıstrligi, Eńbek jáne halyqty áleýmettik qorǵaý mınıstrligi men Otbasy banki ókilderi birlese ótkizgen brıfıng barysynda habarlady.
«El tarıhyndaǵy erekshe sát – 20 mıllıonynshy azamattyń dúnıege kelýin atap ótýdemiz. Bul kún bárimiz úshin mańyzdy. Biz olarǵa árqaısysy 2 mln teńge nomınaldy quny bar syılyq sertıfıkattaryn syılaımyz. Bul jaı ǵana syılyq emes, ol búginnen bastap búldirshinderimizge jarqyn bolashaq qurýǵa úlken múmkindik beredi», dedi Lázzat Erkinqyzy.
Sonymen qatar Basqarma basshysy balalarǵa arnalǵan depozıtterdiń sany artqanyn aıtyp, naqty derekter keltirdi.
«Otbasy bankinde balalarǵa arnalǵan 300 myńǵa jýyq depozıt bar. 5 jasqa deıingi balalarǵa 50 myńnan astam jınaq shottary ashyldy. Al 1 jasqa deıingi eń kishkentaı salymshylarymyzdyń atyna ashylǵan 12 700 depozıt bar», dedi Otbasy bank basshysy.
Elimizdegi árbir otbasynyń, qazirgi jáne bolashaq urpaqtyń ál-aýqatyna oń áserin tıgizetin taǵy bir mańyzdy jaıt – «Ulttyq qor – balalarǵa» biregeı jobasyn resmı túrde iske qosý týraly «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq qorynan balalarǵa tólem jasaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna Memleket basshysynyń qol qoıýy. Jobanyń negizgi maqsaty – Ulttyq qordyń jyldyq ınvestısııalyq kirisiniń 50 paıyzyn balalar 18 jasqa tolǵanǵa deıin merziminen buryn alý quqyǵynsyz maqsatty jınaq shottaryna aýdarý arqyly balalarǵa qoldaý kórsetý.
«2024 jyldyń aqpan aıynan bastap 18 jasqa tolǵan jobanyń alǵashqy qatysýshylary óz tólemin alady. Alynǵan jınaqty – turǵyn úı alýǵa jáne bilimge jumsaýǵa bolady. Otbasy bank bul jobaǵa ýákiletti operatorlardyń biri retinde qatysady. Bul baǵytta bizde úlken tájirıbe bar, tipti jobany qashyqtan, onlaın rejıminde júzege asyrýǵa daıyn platforma da jumys istep tur. Ol enpf-otbasy.kz dep atalady. Mıllıonǵa jýyq adam osy platformany paıdalanyp, kezekte turmaı, artyq ábigersiz nysanaly maqsatqa qoldanyp keledi. Platforma kómegimen jobaǵa qatysýshylar ózderiniń jınaqtaryn belgili maqsattarǵa baǵyttaı alady», dedi Lázzat Erkinqyzy.
