IIM ekstremızmge qarsy is-qımyl departamentiniń asa mańyzdy ister jónindegi aǵa jedel ýákili Azamat Hasenovtyń aıtýynsha, 2022 jylmen salystyrǵanda bıyl mundaı qylmystardyń shamamen 12 paıyzǵa óskeni baıqaldy. Máselen, eger ótken jyldyń 10 aıynyń qorytyndysy boıynsha 141 qylmystyq iske tergeý júrgizilse, bıyl 160 qylmystyq is tergelip jatyr.
«Jyl basynan beri terrorızm aktisi týraly kórineý jalǵan habar bergeni úshin 39 adam qylmystyq jaýapkershilikke tartyldy. Onyń ishinde túrli jaza taǵaıyndalyp, 12 adam sottaldy: bas bostandyǵynan aıyrý jazasyna – 3 adam, bas bostandyǵyn shekteý jazasyna 7 adam tartyldy, bir adamǵa aıyppul salynsa, bir adamǵa medısınalyq sıpattaǵy májbúrleý sharasy belgilendi», dedi spıker.
Aıta ketetin jaıt mundaı habarlamalar Astana jáne Almaty sııaqty iri qalalardan jıi kelip túsedi eken.
«Sońǵy ýaqytta Qaraǵandy jáne Shyǵys Qazaqstan oblystarynda «elektrondyq jalǵan terrorızm» jaǵdaılary kóbeıdi. Jarylǵysh zat qoıyldy degen habarlamalarda kóbinese kólik quraldary, bilim berý, densaýlyq saqtaý jáne sot mekemeleri kórsetiledi», dep atap ótti Azamat Hasenov.
Sonymen qatar bul qylmys úshin qylmystyq jaýapkershilik 14 jastan bastalatynyn eske saldy.
«Terrorızm aktisi týraly kórineý jalǵan habar bergeni úshin polısııa bıyl 14 kámeletke tolmaǵan balany ustady. Almatyda – 6, Qaraǵandy oblysynda – 4, Astana, Jambyl, Mańǵystaý men Pavlodar oblystarynda bir adamnan. Sondaı-aq olardyń barlyǵynyń ata-analary bala tárbıesine qatysty tıisti sharalardy qabyldamaǵany úshin ákimshilik jaýapkershilikke tartyldy. Olarǵa úlken somada aıyppul salyndy», dedi aǵa jedel ýákil.
Aıta keteıik, terrorızm aktisi týraly kórineý jalǵan habarlama úshin Qylmystyq kodekstiń 273-babynyń sanksııasy 5000 AEK (bul 17 mln teńgeden astam) mólsherinde aıyppul salýdy nemese bes jylǵa deıin bas bostandyǵynan aıyrýdy ıa shekteýdi kózdeıdi. Sonymen qatar sot sheshimi boıynsha obektige keltirilgen zalaldy tóleýge týra keledi. Bul soma 200 myńnan 2 mln teńgege deıin jetedi.
