Foto: Ashyq derekkóz
– Aqjol, seniń esimińdi kúlli el tanyp, batyldyǵyńdy qurmettep jatyr. Áp-sátte bulaı áıgili bolamyn dep oılamaǵan da shyǵarsyń.
– Árıne, sol kúni ózi mektepte syrqattanyp, mazam bolmady. Synyp jetekshimnen suranyp, úıge qaıttym. Kúndelikti úıimiz ben mektep arasyna qatynaıtyn qoǵamdyq kólikke otyrdym. Oıymyzda eshteńe joq, sońǵy aıaldamaǵa jaqyndaǵanda abyr-sabyr bastaldy. Avtobýs shaıqap ala jóneldi de, joldan qıys ketip, turǵyn úıge qaraı bet aldy. Azan-qazan daýystan esimiz shyǵyp ketti, qoǵamdyq kóliktiń artqy jaǵynda turǵam, dereý aldyna qaraı umtyldym. Barsam, júrgizýshi aǵaı oń aıaǵymen jyldamdyqty kúsheıtkish quraldy qatty basyp alypty, ózi oryndyǵynan qısaıyp qulap bara jatyr. Esinen tanyp qalǵan eken. Birden aıaǵyn tarttym da, tejegishti basyp avtobýsty toqtattym. Eger tejemegende jer úıge soǵylýy múmkin edi, tym jaqyn qalǵan bolatyn. Gaz qubyryn qıratyp, sý aǵatyn aryqtan da ótip ketken eken.
– Avtobýstaǵy jolaýshylar tek oqýshylar ǵana boldy ma, eresek adamdar da otyrdy ma?
– Aýyldan qatynaıtyn turǵyndar, arasynda oqýshy da, eresek kisiler de boldy. О́zgeler qorqa-soqtap turǵanda, men ǵana batyldyq tanyttym deı almaımyn. Kez-kelgen adam táýekel jasaıtyn sát edi. Eresek adamdar oryndarynan turamyn degenshe men birinshi jetip, júrgizýshige kómekke keldim dep oılaımyn.
О́zim batyrlyq istedim, erlik kórsettim demeımin. Ondaı oı sanama kirip te shyqqan emes. Biraq áleýmettik jelige aqparat taraǵan soń jan-jaqtan habarlasyp quttyqtaýshylar kúrt artty. Aýdan ákimdigi noýtbýk berdi. Almaty oblysynyń ákimi Marat Sultanǵazıev Ile aýdanynyń turǵyndarymen kezdesýi kezinde arnaıy shaqyryp, qurmettedi, sońǵy úlgidegi IPhone 15 modelin syıǵa tartý etti. Mundaı qurmetke kenelemin dep oılaǵam da joq.
– Famılııań – Geroı, atańnyń esimine jazylypsyń.
– Iá, men ákem men anamnyń tuńǵysh ulymyn. О́zimnen keıin alty baýyrym bar. Anam kóp balaly batyr ana, Altyn alqa ıegeri. Atamnyń esimin Geroı dep ákesi qoıypty. Geroı atamnyń ákesi Áben О́mirov 1913 jyly ómirge kelgen eken. Bıyl týǵanyna 110 jyl toldy. Áben babam 1942 jyly Ekinshi dúnıejúzilik soǵysqa attanyp, 1945 jyly elge-aman esen oralǵan. Ulynyń esimin yrymdap Geroı dep Áben babamyz qoıǵan eken. О́zi de soǵysta erligimen daralanyp 1, 2-dárejeli Dańq ordenimen marapattalǵan. О́zimniń atam Geroı ákesiniń erligi týraly, ónegeli ómiri týraly bizge aıtyp berip otyrady. Boıymda Áben babamnyń da qany bolǵandyqtan osyndaı qadamǵa bara aldym dep oılaımyn. Naǵashy jurtym Almaty oblysynyń Panfılov aýdanynan. Naǵashy aǵam Elnur Dáýletuly grek-rım kúresinen Azııa chempıonatynyń kúmis júldegeri, halyqaralyq týrnırlerdiń jeńimpazy.
– Beıbit kúnde batyrlyq jasaý, táýekelge barýdyń qanshalyqty mańyzdy ekenin sezingen bolarsyń?
– Árıne, ózderińizdiń áriptesterińiz kelip telearnadan jarııa etti. Aýdan, oblys basshylary qabyldap, qurmetin aıaǵan joq. Mektebimdegi dırektor da, ustazdarymyz da quttyqtap, alǵysyn aıtyp jatyr. Zamandastarym da batyrdy kútkendeı qadirlep otyr. «Biz de sendeı batyrlyq tanyta alsaq, shirkin» dep tamsanady. Tanymal bolǵan kúshti eken, bári kórgen jerde «sen avtobýsty toqtatqan Aqjol emessiń be?» dep surap jatady. Kishkentaı kezimnen ákemniń janyna ilesip kólik jóndegende kómekshisi bolyp júremin. Tehnıkaǵa jaqyndyǵymnyń da kóp paıdasy tıdi. Syn sátinde árbir adam osyndaı qadamǵa barady dep oılaımyn. Endigári mundaı oqys oqıǵa qaıtalanbasa eken dep tileımin.
