Osy baǵyt boıynsha «Jastar» ǵylymı-zertteý ortalyǵynyń mamandary 6000 jas respondent arasynda áleýmettanýlyq zertteý júrgizip, sonyń qorytyndysy boıynsha jasalǵan Qazaqstan jastarynyń portreti týraly aıtyp berdi.
«Bıyl jastardyń shekti jasynyń 35-ke deıin ulǵaıýy eskerile otyryp áleýmettanýlyq zertteýlerge súıenip, jastar portreti jasaldy. Bul portret densaýlyq, bilim, jumysbastylyq, qundylyqtar, qaýipsizdik, azamattyq jáne saıası belsendilik sııaqty aspektiler boıynsha jastardyń beınesin beredi», deıdi mamandar.
Bıyl «Jastar» ǵylymı-zertteý ortalyǵy júrgizgen áleýmettanýlyq zertteý derekteri búgingi Qazaqstan jastarynyń otbasylyq qundylyqtardy birinshi orynǵa qoıatynyn kórsetti. Bul 14 pen 35 jas aralyǵyndaǵy saýalnamaǵa qatysqan respondentterdiń 72,6%-yn quraıdy. Jastar arasynda otbasy qundylyǵy uzaq ýaqyttan beri alǵashqy pozısııalarda atalyp keledi.
«Sonymen qatar jas azamattardyń 64,8%-y óz densaýlyǵyn óte jaqsy baǵalaıdy, al halyqtyń jas bóliginiń árbir ekinshi ókili (53,2%) salaýatty ómir saltyn ustanady», deıdi sarapshylar.
Jastardyń kópshiligi (73%) bilim alý sapasyna rıza. Sonymen qatar elimizdiń jas turǵyndarynyń jartysynan kóbi (56,1%) qosymsha bilim alyp júr jáne qazirgi ýaqytta tańdalǵan mamandyq boıynsha jumysqa ornalasýǵa bolady (53,3%) dep sanaıdy. Saýalnamaǵa qatysqandardyń 43%-y únemi jumysqa ornalasý problemalaryna tap bolatynyn atap ótken. Jumysqa ornalasqandardyń úshten biri ǵana óz mamandyǵy boıynsha jumys isteıdi.
Sondaı-aq 2023 jylǵa qaraı jastardyń saıası kún tártibine az qatysýy saqtalyp otyr. Jastardyń shıregi ǵana kún saıyn saıası jańalyqtar men oqıǵalarǵa qyzyǵýshylyq tanytady. Al azamattyq belsendilik turǵysynda árbir tórtinshi respondent jastar uıymdarynyń qyzmetine jáne sońǵy 1-2 jyldaǵy jobalarǵa qatysqanyn habarlaǵan.
Sonymen qatar saýalnama nátıjesi jastardyń jeke qaýipsizdigine degen senimdiliginiń joǵary deńgeıin (87,6%) kórsetedi. Alaıda saýalnamaǵa qatysqandardyń 16,3%-y jeke derekterdiń, ásirese áleýmettik jelilerde jarııa bolýynan qorǵalmaǵanyn sezinetinin aıtqan.
Sholý qorytyndysyna súıene otyryp, qazirgi Qazaqstan jastaryn deni saý, bilimdi, belsendi ómir saltyn ustanatyn, otbasyn qundylyqtar júıesinde birinshi orynǵa qoıatyn azamattar dep aıtýǵa bolady. Olar ónerkásipte jumys isteýge onsha qyzyǵýshylyq tanytpaıdy, ózderin salystyrmaly túrde qaýipsiz sezinedi, biraq jeke derekteriniń qaýipsizdigine kúmánmen qaraıdy. Olar sondaı-aq qoǵamdyq qyzmetke belsendi qatysady, biraq saıasatqa onsha qyzyǵýshylyq tanytpaıdy.
Osy jáne basqa da qyzyqty úrdister «Qazaqstan jastary – 2023» ulttyq baıandamasynda kórinis tapty. «Jastar» ǵylymı-zertteý ortalyǵy ázirlegen atalǵan qujat bıyl on birinshi ret jarııalanyp otyr. Jastar ómiriniń negizgi salalary men onyń jaı-kúıi jáne ál-aýqatyn taldaý qamtylǵan baıandamamen eljastary.kz saıtynda tanysýǵa bolady.
