Foto: ashyq derekkóz
«Bıylǵy jylǵy 11 jeltoqsanda Parlament Senatynyń Tóraǵasy jáne Senattyń birqatar depýtaty О́skemende oblys basshylyǵymen jáne oblystyq máslıhat depýtattarymen kezdesý ótkizgen bolatyn. Onda Shyǵys Qazaqstan oblysynyń densaýlyq saqtaý uıymdaryndaǵy kúrdeli qarjy ahýalyna qatysty máseleler aıtyldy. Máselen, oblystaǵy 13 uıymda 6 mlrd teńgeden astam, onyń ishinde eńbekaqy tóleý qory boıynsha 1,3 mlrd teńgeden astam somasynda nesıe bereshegi týyndap otyr», dep senator osyǵan deıin Shyǵys Qazaqstan turǵyndary kótergen máselege toqtaldy.
Depýtattyń aıtýynsha, 2023 jylǵy 20 qarashadaǵy jaǵdaı boıynsha 619 medısınalyq uıymda jalpy somasy 109,6 mlrd teńge bolatyn nesıe bereshegi bar. Medısınalyq uıymdar tıimsiz shyǵyndardy ǵana emes, halyqqa kórsetiletin qyzmetterdiń kólemin de qysqartýǵa májbúr. Medısınalyq qyzmetterdiń tarıfi naqty shyǵyndy jaba almaıdy, bul medısınalyq uıymdarda «tesikterdi biteý» tájirıbesine ákelip soqty.
«Tek eseptelgen nesıe beresheginiń kólemi 2021 jyldan bastap 2 ese kóbeıip ketti, 2022 jyldyń qorytyndysy boıynsha ol 100 mlrd teńgeni qurady, búgingi tańda 109 mlrd bolyp otyr. Bul salany qarjylandyrý kóleminiń 2,5 ese ósýine qaramastan bolǵan jaǵdaı. Sondaı-aq sońǵy 3 jylda halyqtyń qalta shyǵyny da kútkendegideı azaıa qoımady», dedi Aqmaral Álnazarova.
Senator medısınalyq uıymdardaǵy bul qarjy problemalary densaýlyq saqtaýdy strategııalyq josparlaýdaǵy kemshilikterge, medısınalyq qyzmetter nomenklatýrasynyń bolmaýyna, sondaı-aq shyǵystardy baqylaý tetiginiń azdyǵyna baılanysty ekenin atap ótti. Aqmaral Álnazarova osyǵan baılanysty jaǵdaıdyń sebebin taldap, medısınalyq uıymdardyń nesıe bereshegin tómendetý jáne qarjyny paıdalaný tıimdiligin arttyrý úshin shuǵyl jáne júıeli sharalar qabyldaýdy usyndy.
