Eger 2017 jyly otandyq taýardy shetelge satýdyń jalpy kólemi salystyrmaly túrde nebári 12% bolsa, qazir ol 6 % -ǵa ósip, 18%-dy quraıdy. Importy da jyl sanap 15,9%-dan 25,5%-ǵa deıin ulǵaıǵan. Sońǵy 6 jylda Qytaıdyń Qazaqstan naryǵyndaǵy basty básekelesi Reseı bolǵan. Qazirgi tańda Qazaqstandaǵy Reseıdiń eksporty men ımportynyń jalpy kólemi 18,9 mlrd dollaryn qurap otyr. Saýda-sattyq seriktesteriniń úshtigine munaı satyp alýshy retinde tizimge Italııa da (11,7 mlrd dollar) engen.
Qytaıdyń Qazaqstanmen saýdadaǵy taǵy bir joǵary kórsetkishi – bıylǵy jyly taýardyń ımporty (11,3 mlrd dollar) aqshalaı eseptegende alǵash ret eksporttan (10,4 mlrd dollar) asyp túskendigi. Endi Qytaı eń aldymen elimiz úshin jetkizýshi, sodan keıin ǵana satyp alýshy deýge bolady. Qytaılyq jetkizýshiler byltyrǵy jyldyń sáıkes kezeńimen salystyrǵanda birden 45%-ǵa ósken. Mundaı aıtarlyqtaı ósim jetkizilimniń fızıkalyq kólemi jaǵynan ǵana 32,9%-ǵa kóbeıgen. Kedendik statıstıkanyń usynǵan málimetine qaraǵanda, Qytaı kompanııalary negizinen Qazaqstannan shıkizat satyp alýǵa múddeli boldy, olardyń kópshiligi osy jyly arzandaǵan. Máselen, bıyl qańtar-qyrkúıek aılary aralyǵynda Qazaqstan Qytaıǵa 4,4 mln tonna munaı satyp, bul ótken jyldyń sáıkes kezeńimen salystyrǵanda 3,1%-ǵa artyq bolǵan. Bulardyń qatarynda gaz, temir rýdalary men konsentrattary jáne ferroqorytpalar da bar. О́tken jyldan beri Qazaqstan Qytaıǵa joǵary qosylǵan quny bar taýarlardy, sonyń ishinde jylý bólýshi jınaqtardy jetkize bastady. Bul ýran túıirshikterimen toltyrylǵan atom elektr stansalaryna arnalǵan qurylymdar. Biregeı óndiris Shyǵys Qazaqstanda Qazatomónerkásiptiń enshiles kásiporny – Úlbi metallýrgııalyq zaýytynyń bazasynda jumys isteıdi.
Taıaýda ǵana Qytaı tarapynyń shaqyrýymen Premer-mınıstrdiń birinshi orynbasary Roman Sklıar jumys saparymen Qytaıdyń mańyzdy ındýstrııalyq, ınnovasııalyq, ǵylymı jáne bilim berý ortalyqtarynyń biri sanalatyn Hefeı qalasyna (Anhoı provınsııasy) baryp qaıtty. Ol Anhoı provınsııasy partııa komıtetiniń hatshysy Han Szıýnmen jáne Anhoı provınsııasy halyq úkimetiniń tóraǵasy Van Sınsıanmen kelissózder júrgizip, onda saýda-ekonomıkalyq, ınvestısııalyq, ónerkásiptik, mádenı-gýmanıtarlyq salalardaǵy yntymaqtastyqty odan ári jandandyrýdyń ózekti máselelerin talqylady. Bolashaqta elimizdiń aımaqtary men Anhoı provınsııasy arasynda gýmanıtarlyq yntymaqtastyqty ornatý jospary qoıylǵan. Kezdesý barysynda «Astana Motors» JShS men qytaılyq Chery International Co., Ltd avtomobıl óndirýshiler arasyndaǵy yntymaqtastyq týraly memorandýmǵa qol qoıdy. Qujat joǵaryda atalǵan negizderge sáıkes, eki eldiń kásiporyndary arasynda Almaty qalasynyń ındýstrıaldy aımaǵynda avtoındýstrıaldy parkti birlesip salýdy jáne saladaǵy strategııalyq yntymaqtastyqty damytýdy josparlap otyr.
