Osy oraıda kúni keshe ǵana Ulttyq akademııalyq kitaphanada Túrki akademııasynyń uıymdastyrýymen «Baýyrlastyq tamyry: tulǵalar ǵıbraty» atty halyqaralyq konferensııa ótti. Alqaly jıynǵa belgili memleket jáne qoǵam qaıratkerleri, dıplomatııalyq mıssııa basshylary, tanymal ǵalymdar men zııaly qaýym ókilderi qatysty.
Taǵylymdy is-shara aıasynda belgili tarıhshy Afet Inannyń qazaq tiline alǵash ret aýdarylyp basylǵan «Atatúrikti eske alǵanda» eńbeginiń, kemeńger kóshbasshy Geıdar Álıevtiń qyzmet atqarǵan jyldarynan syr shertetin «Karizmatik Lider Parlak Şahsiyet Haydar Aliyev» («Ult kóshbasshysy, jarqyn tulǵa Geıdar Álıev»), qazaq detektıv janrynyń negizin salýshy Kemel Toqaev týraly «Kemel Tokayev: Bir Kalem Ustasinin Yaşam Öyküsü» («Kemel Toqaev: qalamgerdiń ómir joly») kitaptarynyń tusaýkeser rásimi ótti.
Jıyn barysynda Túrki akademııasynyń prezıdenti Shahın Mustafaev, Parlament Senatynyń depýtaty Darhan Qydyráli, Túrki memleketteri uıymy Aqsaqaldar keńesiniń múshesi Gasan Gasanov, memleket jáne qoǵam qaıratkeri Ádil Ahmet, Túrkııa Respýblıkasynyń Qazaqstan Respýblıkasyndaǵy Tótenshe jáne ókiletti elshisi Mustafa Kapýdjý, Qyrǵyz Respýblıkasynyń burynǵy memlekettik hatshysy, Qyrǵyz Respýblıkasy Ulttyq ǵylymdar akademııasynyń akademıgi Osmonakýn Ibraımov, Ulyqbek atyndaǵy О́zbekstan Ulttyq ýnıversıtetiniń professory Nasımhon Rahmonov sóz sóıledi.
О́z sózinde Sh.Mustafaev túrki áleminiń kórnekti tulǵalaryn nasıhattaýdyń mańyzy zor ekenin atap ótti. «Baýyrlas halyqtarymyzdaǵy tuǵyrly tulǵalardyń ómir joldaryndaǵy bir-birimen tabysatyn tustar bizdiń ortaq ótkenimizge arqaý bolyp tabylady. Olardyń talaıly taǵdyrlarynyń arnasynda bizdiń halyqtarymyzdyń «tar jol taıǵaq keshken» tarıhı joly beınelengen. Osy turǵydan alǵanda, kórnekti tulǵalardyń ómirbaıany tarıhtyń eń tańdaýly oqýlyǵy ispetti», dedi akademııa basshysy.
Senat depýtaty Darhan Qydyráli kópshilik nazaryna usynylǵan kitaptar týraly paıymdy pikirlerimen bólisip, akademııanyń tuǵyrly tulǵalardy nasıhattaý baǵytyndaǵy jumystardy tabysty júrgizip kele jatqanyn atap ótti.
TMU Aqsaqaldar keńesiniń múshesi Gasan Gasanov Ázerbaıjannyń Jalpyulttyq kóshbasshysy Geıdar Álıevpen qyzmettes bolǵan jyldar oqıǵalary men estelikterin ortaǵa salyp, onyń baýyrlas halyqtardy jaqyndastyrýdaǵy róli týraly baıandady.
Elshi Mustafa Kapýdjý Túrkııa Respýblıkasy qurylýynyń ǵasyrlyq mereıtoıyna arnalǵan mańyzdy is-sharalardyń ótip jatqanyn atap ótip, osy oraıda akademııa tarapynan uıymdastyrylǵan bul basqosýdyń joǵary deńgeıde ótkenine zor rızashylyǵyn bildirdi.
Ulyqbek atyndaǵy О́zbekstan Ulttyq ýnıversıtetiniń professory Nasımhon Rahmonov Kemel Toqaevtyń qazaq ádebıetinde detektıv janrynyń negizin qalaǵan jazýshy ekenine toqtalyp, onyń týyndylary ózbek ádebıetinde de atalǵan janrdyń qalyptasýyna yqpal etkenin aıtty.
«Atatúrikti eske alǵanda» dep atalatyn estelikter toptamasy – Afet Inannyń Túrik tarıhy qoǵamy 2021 jyly jaryqqa shyǵarǵan «Kemal Atatürk’ü Anarken» atty kitabynyń qazaq tiline alǵash aýdarylǵan nusqasy. Kitapqa zııaly túrik áıelder qaýymynyń kórnekti ókili Afet Inan hanymnyń Túrkııa Respýblıkasynyń negizin qalaǵan tulǵa Mustafa Kemal Atatúrik týraly estelikteri men oı-tolǵamdary jınaqtalyp berilgen.
Ázerbaıjan Respýblıkasynyń burynǵy Premer-mınıstri, memleket jáne qoǵam qaıratkeri, TMU Aqsaqaldar keńesiniń múshesi Gasan Gasanovtyń «Ulttyq kóshbasshy, jarqyn tulǵa – Geıdar Álıev» (túrik tilinde) atty suhbat janryna qurylǵan kitaby Geıdar Álıevtiń táýelsizdik jyldary qarsańyndaǵy qyzmeti kezeńderi týraly estelikterin arqaý etken.
Al «Kemel Toqaev: ádebıetshiniń ómir joly» (túrik tilinde) jınaǵynyń alǵashqy taraýy el Prezıdenti Qasym-Jomart Toqaevtyń álemniń birqatar tilinde jaryq kórgen «Áke týraly oı-tolǵaý» atty memýarymen bastalady, keıingi bólimderde túrki áleminiń belgili ádebıetshileriniń, kóptegen qazaq qalamgerleri men qoǵam qaıratkerleriniń Kemel Toqaev týraly estelikteri, pikirleri berilgen.
