Bıyl 6 – halyqaralyq, 34 – respýblıkalyq kórmelerdiń arasynan Ispanııa, Italııa, Fransııa, Japonııa, Ońtústik Koreıa elderi Elshilikterimen birge uıymdastyrylǵan halyqaralyq kórmelerdi erekshe atap ótýge bolady.
Mýzeı ǵylymı qyzmetkerleri 6 monografııa, 1 katalog, 4 jınaq, 129 ǵylymı maqala jarııalaǵan, onyń ishinde halyqaralyq Scopus bazasyna 11 maqala engen.
Jazǵy maýsymda ótken 8 arheologııalyq, 3 etnografııalyq ekspedısııa jumystary qatarynda Germanııanyń Tıýbıngen ýnıversıtetimen, Reseı Ǵylym akademııasy Sibir bóliminiń Arheologııa ınstıtýtymen (Novosıbırsk qalasy), «Otandastar qory» KEAQ-pen birlesken halyqaralyq ekspedısııalar bar.
Mýzeı qoryna turaqty saqtaý úshin 1 009 birlik zat túsip, konservasııalaý jáne qalpyna keltirý qyzmetiniń mamandary 443 dana eksponatty qaıtadan qalpyna keltirgen.
11 mýzeı qyzmetkeri Mádenıet jáne aqparat mınıstrliginiń qoldaýymen 19 maýsym – 24 qarashada Reseı Federasııasynyń Máskeý qalasyndaǵy Memlekettik qalpyna keltirý ǵylymı-zertteý ınstıtýtynda, Qazan Federaldy ýnıversıtetinde kásibı biliktilikterin jetildirýge múmkindik aldy.
Ǵylymı turǵydaǵy taǵy bir aıtar jetistik – «Mádenı mura» jýrnalynyń resmı saıty ashyldy. 20 jyldan astam tarıhy bar jýrnal 2020 jyly mádenı-tanymdyq sıpattan ǵylymı baǵytqa aýystyrylǵan edi.
13 sáýirde Ulttyq mýzeıinde elimizdiń ejelgi tarıhyn nasıhattaý maqsatynda «Paleontologııa» zaly men halqymyzdyń ulttyq sándik-qoldanbaly óneri men qolónerin saqtaý, zerdeleý jáne nasıhattaý maqsatynda Qolónershiler ortalyǵy ashyldy.
27 qazanda Ulttyq mýzeı tarıhynda alǵash ret Qazaqstan mýzeı qyzmetkerleriniń I kongresi uıymdastyrylyp, oǵan elimizdiń 60 mýzeıinen 200-ge jýyq maman qatysty.
«Mýzeıdegi mektep kúni» pılottyq mádenı-aǵartýshylyq jobasy jalǵasyp, 2023 jyly joba sheńberinde barlyǵy 80 sabaq ótkizilip, 1 548 oqýshy qatysqan.
2023 jyly Ulttyq mýzeıdi tamashalaýshylar kóbeıip, olardyń sany 587 myń 874 adamǵa, ıaǵnı, rekordtyq kórsetkishke jetti.
