Shynynda da el-jurtty, qarapaıym halyqty, tutas qoǵamdy oılandyryp-toǵandyryp, tipti eleńdetip júrgen máseleler, suraqtar barshylyq bolatyn. Búgingi kúnde qolymyz jetkeni qaısy, qaıda jáne qaıtyp ilgeri bara jatyrmyz, qandaı aýqymdy saıası-áleýmettik ózgerister júrip jatyr, eki jyl burynǵy qasiretti Qańtar ýaqıǵasy tıisti baǵasyn aldy ma, odan qandaı sabaq aldyq, eski bıliktiń sarqynshaqtary áli etekten tartyp keledi ǵoı, olardan qalaı qutylamyz, ekonomıkalyq damýda tyń serpilister bar ma degen sııaqty san alýan, óte ózekti suraqtar óte qarapaıym túrde, naqty jaýaptaryn alǵanyn erekshe atap ótkenimiz oryndy dep bilemin.
Qalyń qaýymdy erekshe ýaıymǵa uryndyryp júrgen úlken máseleniń biri nesıesin ýaqtyly óteı almaı, qaryzǵa belshesinen batýy óte kúrdeli jaǵdaı ekeni ras. Onyń ústine qymbatshylyqtyń beleń alǵany, tarıfterdiń ósip jatqany, jumyssyzdyqtyń búıirden qysqany ótirik emes. Memleket basshysy bul máselelerge de egjeı-tegjeıli toqtap, sheshý amaldaryn iske qosyp jatqanyn senimdi túrde jarııalady. Otyn energetıka kesheni men kommýnaldyq sharýashylyqtardaǵy múshkil aqýaldyń kóp jyldyq salǵyrttyqtyń saldary ekeni de ashyq aıtyldy. Bul rette de qolǵa alynǵan sharalar men aldaǵy atqarylar ister naqty túrde baıandaldy.
Prezıdentimizdiń suhbat barysynda erekshe mán berip, nazar aýdarǵan máselesi – ultymyzdyń bolashaǵy, ósip-órkendeýi der edim. Qoǵamda eńbekqorlyq pen jasampazdyq joǵary baǵalanýǵa, bilimpazdyq pen jańashyldyq saltanat qurýǵa tıis. «Biz ozyq oıly ult retinde halqymyzdy ydyratatyn emes, biriktiretin joldy tańdap, tek qana alǵa qaraýymyz kerek», dedi ol. Shynynda da dúnıetanymymyzǵa jat mádenıetterge kózsiz elikteýden, jalǵan patrıotızmnen, dańǵoılyq pen daraqylyqtan saqtanýymyz kerek. Memleket basshysy erekshe atap ótkendeı «eńbekqorlyq, bilimpazdyq, kásibılik, birlik, yntymaq, jańashyldyq, iskerlik, bastamashyldyq, adaldyq, qarapaıymdylyq jáne únemshildik – naǵyz otanshyl, adal azamatqa tán qasıetter men qundylyqtar».
Osy qasıetter men qundylyqtardy jan-jaqty dáriptep, urpaq sanasyna sińirý basty boryshymyz ekenin, elimizdegi bilim salasynyń ustazdary, oqytýshylary, professorlary men ǵalymdary tereń sezinip, úlken jaýapkershilikti moıynǵa alyp, abyroımen atqarýǵa kúsh-jigerimizdi, búkil tájirıbemizdi jumsaımyz dep halqymyzdy sendiremiz.
Ulyqpan SYDYQOV,
Qazaqstannyń eńbek sińirgen qaıratkeri, fılosofııa ǵylymynyń doktory, Q.I.Sátbaev atyndaǵy QazUTZÝ professory, QR Ulttyq jaratylystaný ǵylymdary akademııasynyń akademıgi, Qazaqstannyń qurmetti jazýshysy
