Oqıǵa Jırentaev kóshesindegi kópqabatty úıde bolǵan. Belgisiz adam lıftke kirip, ony tepkileı bastaǵan, sonymen qatar kabınany judyryqpen uryp, tyrnap, túkirgen.
Almaty aýdandyq Polısııa basqarmasynyń polıseıleri qylmyskerdiń jeke basyn anyqtady. Ol 33 jastaǵy jergilikti turǵyn bolyp shyqty. Ony ýaqytsha ustaý bólmesine ornalastyrdy.
Osy iske qatysty usaq buzaqylyq jasaǵany jáne jalpy paıdalaný oryndaryn lastaǵany úshin QR ÁQBtK 434-babynyń 1-bóligi jáne QR ÁQBtK 434-2-babynyń 1-bóligi boıynsha ákimshilik is qozǵaldy.
Aıta keteıik, elordada vandalızmniń kez kelgen kórinisterimen belsendi kúres júrgizilip jatyr.
2023 jyldyń basynan beri elorda polısııasynyń qyzmetkerleri vandalızmniń júzden astam faktisin anyqtady. Qala boıynsha kúndelikti patrýldi eki myńnan astam polısııa qyzmetkeri júzege asyrady.
Eske salaıyq, elordada eriktiler, belsendiler, tanymal sportshylar, pikir kóshbasshylary, qala turǵyndary qoldaǵan «Toqta, vandal» aksııasy jalǵasyn taýyp jatyr. Aksııa aıasynda qalada kúndizgi jáne túngi reıdter ótkiziledi, halyq arasynda qoǵamdyq tártipti saqtaý qajettiligi týraly túsindirý jumystary júrgiziledi.
