Osydan 9 jyl buryn oblystyq medısına ortalyǵyndaǵy jergilikti dárigerler A.Syzǵanov atyndaǵy Ulttyq ǵylymı hırýrgııa ortalyǵy mamandarymen birlesip, qala turǵynynyń búıregin aýystyrǵan. Týǵan qaryndasy donor bolǵan jigitke jasalǵan operasııa sátti ótip, ómiri «jasandy búırekke» baılanǵan talaılardyń úmiti oıanyp edi.
Uzaq jyldardan keıin jýyrda oblystyq kópbeıindi aýrýhanada A.Syzǵanov atyndaǵy Ulttyq ǵylymı hırýrgııa ortalyǵynyń basqarma tóraǵasy, medısına ǵylymdarynyń doktory, professor, joǵary sanatty dáriger Bolatbek Baımahanov osy aýrýdyń zardabyn tartyp júrgen 25 jastaǵy naýqasqa operasııa jasady. Búırek aýystyrý oıdaǵydaı ótip, úsh jyldan beri jasandy búırek apparatyna kúni qarap qalǵan jas jigit qalypty tirshilikke oraldy. Oǵan 36 jastaǵy týysqan aǵasy donor bolýǵa kelisimin beripti.
B.Baımahanov elimizde 2011 jyldan beri búırek jáne baýyr transplantasııasy keńinen júrgizilip kele jatqanyn aıtady. Osy kúnge deıin 1000-ǵa tarta operasııa jasalypty.
«Oblystyq kópbeıindi aýrýhanada mundaı kúrdeli operasııalardy isteýge tolyq jaǵdaı bar. Tórt saǵattan asa ýaqytqa sozylǵan operasııa sátti ótti», deıdi B.Baımahanov.
Álemdik statıstıkada mundaı operasııanyń 80 paıyzynda naýqas ómirin qaıtys bolǵandardyń aǵzasy qutqaryp tur. Al bizdiń elimizde kóbine jany qysylǵan naýqasqa jaqyndary kómekke jetedi. Búginde oblystaǵy transplantasııalanǵan 85 naýqastyń 82-sine óz týysy donor bolǵan.
Qyzylorda
