FOTO: dknews.kz
Jańa biregeı óndiris ishki naryqqa otandyq bızneste suranysqa ıe daıyn taýarlardyń keń spektrin óndirýge shıkizat beredi.
Kaýstıkalyq soda ártúrli óndiris salasynda toqyma, hımııa, tamaq, munaı jáne basqa da kóptegen salada qoldanylady. Kir jýatyn untaqtyń, sýsabyndardyń, jýǵysh jáne tazartqysh zattardyń kópshiliginde kaýstık bar, qaǵaz, vıskoza, tamaq jáne alıýmınıı totyǵyn óndirýde de qoldanylady.
PVH sıntetıkalyq materıaldarǵa jatady. Ol medısınalyq ónimderdi (qan preparattary men ishki aǵzalardy saqtaýǵa jáne tasymaldaýǵa arnalǵan konteınerler, kateterler, dári tamyzǵyshtar, qolǵaptar, maskalar, tabletkalarǵa arnalǵan qaptamalar) óndirýde, avtomobıl jasaýda (tyǵyzdaǵyshtar, salondy jabdyqtaý elementteri, elektrıkany oqshaýlaý), qurylysta (PVH-dan jasalǵan sendvıch-panelder, terezelerge arnalǵan vınıl profılder, káriz qubyrlary men oqshaýlaǵysh materıaldar), qaptama retinde (jumsaq jáne qatty ydystarǵa arnalǵan plenka, bótelkeler, tis pastasy men kremderge arnalǵan tútikter, uıaly telefon korpýstary jáne olarǵa kerek-jaraqtar) qoldanylady.
Jobany Qazaqstannyń ekinshi deńgeıdegi bankimen birlese otyryp qarjylandyrý aıasynda qoldaý josparlanyp otyr. Onyń jalpy quny – 153,88 mlrd teńge, onyń ishinde QDB-nyń qatysýy 64,46 mlrd teńgeni quraıdy.
– Jobanyń mańyzdylyǵy qazirgi tańda Qazaqstanda polıvınılhlorıdtiń (PVH) óndirisiniń bolmaýynda jatyr, al keleshekte boı kóteretin kásiporyn ishki naryqtyń osy ónimge degen qajettiligin tolyǵymen jabady. Sondaı-aq joba kaýstıkalyq sodanyń ishki naryǵyn ulǵaıtýdy qosa alǵanda, jalpy, hımııa salasynyń damýyna serpin beredi, – dep túsindirdi QDB basqarma tóraǵasy Marat Elibaev.
Zaýyt Túrkistan oblysynyń damýy úshin mańyzdy áleýmettik-ekonomıkalyq áser etedi. Onyń qurylys jumystary júrgiziletin kezeńinde 1 myńǵa jýyq jumys orny ashylady. Al óndiris oshaǵy paıdalanýǵa berilgennen keıin otandyq mamandar úshin jańadan 346 jumys orny qurylady.
Jobalyq qýatqa shyqqan kezde kásiporyn jylyna 100 myń tonnaǵa deıin kaýstıkalyq soda, 120 myń tonna PVH jáne 180 myń tonna kalsıı karbıdin óndiredi. Ishki naryqty qamtýdan basqa, EAEO jáne Eýropalyq odaq elderine, sondaı-aq Qytaı men Túrkııaǵa eksport josparlanǵan.
– QDB tarapynan bólingen ınvestısııalardyń arqasynda bizdiń elimizde áleýmettik mańyzy bar, qala quraýshy jáne óńir men búkil Qazaqstannyń damýyna qýatty serpin beretin jańa joba paıda bolady. Osy jobany iske asyrý barysynda jańa jumys oryndary ashylady, bıýdjetke jyl saıynǵy salyq tólemderi edáýir ulǵaıyp, onyń mólsheri 10 mlrd teńgeden astam somany quraıtyn bolady, – dep atap ótti «Sastóbe» ınnovasııalyq kesheni» JShS dırektory Bolat Estemesov.
