Kollajdy jasaǵan Amangeldi Qııas, «Egemen Qazaqstan»
Qazaqstanda mal urlyǵy jalpy qylmystyń 3 paıyzyn (42 354-tiń 1477-si) quraıdy. Tutastaı alǵanda kórsetkish tómen bolǵanmen urlyqtyń bul túri qarapaıym halyqqa aıtarlyqtaı japa shektirip tur.
IIM mal urlaý faktisiniń túbin teksere kele osy tıptegi urlyq qaraýsyz jaıylyp júrgen maldarǵa qatysty kóp tirkeletinin anyqtaǵan. Sandarǵa súıensek, ótken jyly bolǵan mal urlyǵynyń 1477-den 1111-i túlikti qaraýsyz qaldyrý sebebinen bolǵan.
«Sońǵy 5 jylda mal urlyǵyn 62,5 paıyzǵa, onyń ishinde 2023 jyly 16,3 paıyzǵa deıin azaıttyq. Munymen toqtap qalmaımyz, osy baǵyttaǵy jumystar turaqty júrgizilip jatyr.
Tórt túliktiń qaýipsizdigin qamtamasyz etý maqsatynda Ishki ister mınıstrliginiń bastamasymen ákimdikter maldy jaıý erejelerin ázirlep, bekitti. Erejege saı olardy baqylaýsyz jaıýǵa tyıym salynady.
Belgilengen erejeni buzǵany úshin mal ıelerine 3-ten 10 AEK-ke deıin (shamamen 11- 37 myń teńgege) aıyppul salý kózdelgen. Ákimshilik quqyq buzýshylyq týraly kodekstiń 408-baby boıynsha jaýapkershilik belgilenedi», dep habarlady Ishki ister mınıstrligi.
Aıta keteıik, mal urlyǵy úshin beriletin eń joǵarǵy jaza: mal-múlkin tárkileý, 12 jylǵa deıin bas bostandyǵynan aıyrý.
