Áldeneshe jyl buryn Jambyl oblysyndaǵy tehnıkanyń 80 paıyzynyń tozyǵy jetip turǵandyǵy týraly málimet taraǵan edi. Keıingi jyldary bul kórsetkish edáýir jaqsara túskeni syńaıly. О́tkir másele Prezıdenttiń de tikeleı nazarynda ekeni anyq. О́ıtkeni bul problemany Qasym-Jomart Toqaev birneshe márte eske saldy, eskertti de.
Prezıdent Qazaqstan halqyna arnaǵan «Ádiletti Qazaqstannyń ekonomıkalyq baǵdary» atty Joldaýynda aýyl sharýashylyǵy salasyndaǵy tozyǵy jetken tehnıkalardy jyl saıyn 8-10 paıyzǵa jańartyp otyrý qajettigin aıtty.
«Aýyl-aımaqty damytý úshin shaǵyn sharýashylyqtardy qoldaý óte mańyzdy. «Aýyl amanaty» baǵdarlamasynyń elge qajet ekeni aıqyn kórindi. Onyń kelesi kezeńinde jeńildetilgen nesıe berýmen shektelip qalmaý kerek. Jeke qosalqy sharýashylyq ıeleri ózara birigýi qajet. Osyǵan qajetti jaǵdaı jasalýǵa tıis», degen Memleket basshysynyń sózi jergilikti atqarýshy bılik ókilderine de oı saldy.
Sońǵy derekke sensek, óńirdegi aýyl sharýashylyǵy tehnıka parki 13,1 paıyzǵa jańarypty. Árıne, bir qaraǵanda bul kórsetkish kádimgideı kóńil toǵaıtady. Oblys ákimdigi aýyl sharýashylyǵy basqarmasynyń baspasóz qyzmeti keltirgen derekke júginsek, Prezıdent tapsyrmasyn oryndaý boıynsha naqty jumystar qolǵa alynyp jatyr eken. Kóńilge qonatyn nátıje de joq emes.
«О́ńirde 13,8 myń dana tehnıka tirkelse, onyń 4 570 danasy traktor, 985 danasy kombaın jáne 8 281 danasy basqa tehnıkalar. Bul rette tirkelgen barlyq aýyl sharýashylyǵy tehnıkalarynyń 9,5 myńnan astamynyń paıdalaný merzimi 10 jyldan asqan. Iаǵnı 68,7 paıyzynyń tozyǵy jetken.
Al 10 jylǵa deıingi paıdalanýdaǵy tehnıka úlesi – 31,3,% nemese 4,3 myń dana. Onyń ishinde 4,6 myń traktordyń 2,4 myńnan astamynyń paıdalaný merzimi 10 jyldan asqan. Iаǵnı 52,6 paıyzynyń tozyǵy jetip tur», deıdi jaýapty basqarmanyń baspasóz qyzmeti.
Naqty derekke júginsek, barlyq aýyl sharýashylyǵy tehnıkalarynyń 68,7 paıyzynyń tozyǵy jetken eken. Iаǵnı 9,5 myńnan astam tehnıkanyń paıdalaný merzimi on jyldan asyp ketken. Sondaı-aq óńirdegi traktordyń 52,6 paıyzy eskirgen. Bul tehnıkalardy jańalaýǵa áli de birneshe jyl ýaqyt ketetin sekildi.
Qalaı desek te on jylǵa deıingi paıdalanýdaǵy traktordyń úlesi sońǵy ýaqytta edáýir artqany baıqalady. Salystyrmaly túrde aıtsaq, birneshe jyl burynǵy kórsetkishten edáýir jaqsarǵan. Búginde jyly jańa traktordyń sany 47,4 paıyzǵa jetken. Árıne, áli de bolsa jalpy kórsetkishtiń jartysyna jetken joq. Áıtkenmen osy jyly taǵy da tehnıka parki jańalanatynyn eskersek, eski tehnıkanyń sany tam-tumdap bolsa da azaıatyn sekildi.
«Memleket basshysy Qasym-Jomart Toqaevtyń aýyl sharýashylyǵy tehnıkasyn jańartý boıynsha tapsyrmasyna sáıkes oblysta júıeli jumystar júrgizilip jatyr.
О́tken jyly oblys boıynsha 1 642 tehnıka (8 birlik kombaın, 380 birlik traktor, 1 254 birlik basqa da tehnıkalar) satyp alynyp, tehnıka parkiniń jańartylý deńgeıi 13,1 paıyzdy qurady. Al osy jyly tehnıka parkiniń jańarý kórsetkishin 13,5 paıyzǵa jetkizýdi josparlap otyrmyz.
Jalpy, ótken jyly óńirimizde «Aýyl amanaty» baǵdarlamasy aıasynda 18,4 mlrd teńgege 3 myńnan astam joba qarjylandyryldy. Bul, árıne – úlken qoldaý. Nátıjesinde, qurylǵan aýyl sharýashylyǵy kooperatıvterine 352 birlik tehnıka satyp alyndy. Onyń ishinde jambyldyq dıqandar jalpy quny 803 mıllıon teńgeni quraıtyn «Lovol», «Zýmlıon», «Iýto» jáne «MTZ» markaly 55 traktorǵa qol jetkizdi», deıdi oblys ákimdigi aýyl sharýashylyǵy basqarmasynyń basshysy Nurbı Jigitekov.
Qalaı alyp qarasaq ta, Prezıdent pármeninen keıin tehnıka parkin jańalaý jumysynyń boıyna qan júgirgen sekildi. Árıne, tozǵan tehnıkanyń sany áli de az emes. Olardy jańartý jumystary tolassyz jalǵasa bermek.
Jambyl oblysy
