Foto: turanews.kz
El ishindegi kóshi-qon «Qýatty óńirler – el damýynyń draıveri» ulttyq jobasy negizinde júzege asyrylyp jatyr. Joba maqsaty óńirler arasyndaǵy eńbek kúshin teńestirý.
2021 jyly Astanadan Soltústik Qazaqstan oblysynyń Taıynsha qalasyna qonys aýdarǵandar qatarynda Quralaı Masatbaeva da bar. Ol Taıynshaǵa kelgeli turmysy túzelip, jeke kásibin bastaǵanyn aıtty.
«Bastapqy áskerı daıyndyq» mamandyǵy boıynsha joǵary bilimi bar Quralaı 2023 jyly 1 mln 380 myń teńge somasynda memlekettik grant alyp, shaǵyn kondıterlik dúkenin ashqan.
«Kóshkennen keıin otbasymyzǵa 612 570 teńge somasynda kóshýge materıaldyq kómek berildi, sondaı-aq bizge qaladan memlekettik jalǵa beriletin turǵyn úı berildi», dedi qonys aýdarýshy.
Aıta keteıik, Ulttyq joba aıasynda qonys aýdarýshylarǵa mynadaı memlekettik qoldaý kórsetiledi:
- kóshýge arnalǵan sýbsıdııa – otaǵasyna jáne otbasynyń árbir múshesine 70 AEK mólsherinde birjolǵy kómek;
- otbasy músheleriniń sany men eldi mekenge baılanysty 15-ten 30 AEK-ke deıingi mólsherde 12 aı ishinde turǵyn úı jaldaýǵa jáne kommýnaldyq qyzmetterge aqy tóleýge aı saıynǵy sýbsıdııalaý;
- qysqa merzimdi kásiptik oqytýǵa jiberý;
- jumysqa ornalasýǵa nemese kásipkerlik bastamany damytýǵa járdemdesý;
- Ekonomıkalyq utqyrlyq sertıfıkattaryn berý.
«Budan basqa óńiraralyq qonys aýdarýǵa járdem kórsetetin jumys berýshilerge de turǵyn úımen qamtamasyz etilgen jáne keminde 2 jyl merzimge turaqty jumysqa qabyldaǵan árbir qyzmetkeri úshin 400 AEK mólsherinde jumysqa ornalasýǵa birjolǵy sýbsıdııa beriledi. О́tken jyly barlyq qonys aýdarǵandardyń ishinde 4 158 adam eńbekke jaramdy bolyp, onyń 3 079-y turaqty jumysqa ornalastyrylǵan, 164 adam kásipkerlik qyzmetpen aınalyssa, 35 adam bıznes ashý úshin granttar aldy», delingen mınıstrlik habarlamasynda.
