Foto: «Qazaqstan munaı jabdyqtary zaýyty» baspasóz qyzmeti
2017 jyly irgesi qalanǵan zaýytta búgingi kúni quny 12 mıllıard teńgeni quraıtyn 3 seh tolyqqandy jumys isteıdi. Aqtóbe qalasynda ornalasqan zaýytta 12 aıda ortasha ónimdiligi 50 myń tonna bolat qubyr jáne qaptamalyq qubyrlar, profılder, 3800 tonna joǵary qysymdy qurylǵylar, 50 pesh pen 30 separator, armatýralar, 24 jyljymaly burǵylaý qondyrǵysy shyǵarylady. Zaýyt «QazMunaıGaz», «Embimunaıgaz», «Mańǵystaýmunaıgaz», «Qarajambas», «Qazaqoıl», «Qazaq-túrikoıl», «Aqtóbemunaıgaz» munaı óńdeý ónerkásipterin «qara altyn» óndirý prosesine qajet qural-jabdyqpen qamtıdy. Sondaı-aq, otandyq qurylǵylar Reseı, Qytaı memleketterine eksporttalady.
«Qazaqstan munaı jabdyqtary zaýyty» JShS Qazaqstanda munaı-gaz ónerkásibin damytýmen birge, mashına qurastyrý, jańa tehnologııalardy óndirý, jańa ónerkásiptik kásiporyndardy ashý baǵytynda jańa jumys oryndaryn usyný, tehnar maman daıarlaý arqyly da el ekonomıkasynyń damýyna oń yqpal etip jatyr. Búginde zaýytta 220 jumysshy qyzmet etedi, onyń ishinde, 200-i jergilikti turǵyndar bolsa qalǵan 20-sy Qytaı azamattary. Olar negizinen konsýltatıvtik qyzmet kórsetedi.
«Zaýyt ashylǵanda jylyna 10 000 tonna kólemdi tútik jáne qaptama qubyrlaryn, 20 bloktyq jabdyqtar jıyntyǵyn shyǵarý maqsatyn alǵa qoıdyq, biz bastapqy josparlarymyzǵa qol jetkizdik. Qazirgi tańda munaı-gaz qurylǵylaryn óndirý boıynsha naryqtyń bir bóligin jabamyz. Bolashaqta óndiris kólemin ulǵaıtyp, jańa qurylǵylar jasaý úshin ınvestısııa quıyp jatyrmyz. Qytaılyqtarmen birlesken yntymaǵymyzdy nyǵaıtý arqyly mamandardy kásibı shyńdaý, qaıta daıarlaýǵa yqylastymyz», dedi «Qazaqstan munaı jabdyqtary zaýyty» satý bóliminiń basshysy Danııar Lekerov.
Zaýyt basshylyǵy 2025 jyly jańa ónim shyǵaratyn tórtinshi sehty iske qosýdy kózdep otyr.
Zaýyt jumysshylarynyń áleýmettik ál-aýqatyn jaqsartýǵa múddeli. Olardy tasymaldaý, túski, keshki aspen qamtý, biliktiligin damytý sharalary kásiporyn qarajaty esebinen júrgiziledi. Qyzmetkerlerdiń kún tártibin 2019 jyldan beri osy zaýytta eńbek etip júrgen Azamat Shamshıev aıtyp berdi.
«Kúndelikti 8:00-den 17:00-ge deıin jumys jasaımyz. Bizdiń zaýytta óz mamandyǵymyz negizinde nemese qosymsha qyzyqqan is boıynsha tájirıbe jınaý úshin jumys ýaqytynan tys sheberlik dáristeri jıi ótkiziledi. Demalys kúnderi mamandar jumystyń oryndalý retin, jańa stanokta jumys isteý erejelerin, ólshemderge muqııat bolý syndy isterdi úıretedi. Mundaı kúnderi de tasymaldaý, as-sýmen qamtýdy zaýyt moınyna alady», deıdi 5 razrıadty tokar Azamat Shamshıev.
«Qazaqstan munaı jabdyqtary zaýyty» JShS aldaǵy ýaqytta ónim kólemin arttyrý, sapany jaqsartý, saladaǵy jańashyldyqtardy ónerkásip óndirisine engizý úshin mamandardy Qytaıdyń Úrimshi qalasynda ornalasqan Sınszıan ýnıversıtetine tájirıbe almasýǵa jiberýdi josparlap otyr.
