- Shaıbaly hokkeıden Qazaqstannyń jastar quramasy (U-20) Mınskide ótken «Bolashaq kýboginde» súreńsiz óner kórsetti. Alǵashqy matchta olar Belarýs quramasynan (U-20) 2:5 esebimen ese jiberse, ile-shala Reseıden (U-18) oısyraı utyldy – 1:8. Sońǵy kezdesýdi Sergeı Starygınniń shákirtteri reseılik jasóspirimdermen (U-17) sheberlik baıqasty. Bul básekede de jerlesterimiz jeńilis tapty – 4:7.
- Dohada ótip jatqan sý sporty túrlerinen álem birinshiliginde Qazaqstan quramasy ártistik júzýden Olımpııa oıyndarynyń lısenzııasyn ıelendi. Sonymen qatar byltyr Azııa oıyndarynda qola medal alǵan Iаsmına Tuıaqova men Arına Pýshkına juby da Parıjdegi dúbirli dodada óner kórsetý qurmetine ıe boldy.
- 2023 jyly qarjylaı turǵydan mol oljaǵa kenelgen sportshylardyń reıtıngi jarııalandy. AQSh-tyń «Sportico» jýrnalynyń málimetinshe, byltyr eń kóp tabys tapqan sańlaq – «Ál-Nasrdyń» shabýylshysy Krıshtıaný Ronaldý. Portýgalııalyq juldyzdyń esepshotyna 275 mln dollar aýdarylǵan. Sondaı-aq eń baqýatty bestiktiń qatarynda amerıkalyq golfshy Djon Ram (203 mln), Argentınanyń áıgili aıaqdop sheberi Lıonel Messı (130 mln), AQSh basketbolshysy Lebron Djeıms (125,7 mln) jáne Fransııanyń fýtbolshysy Kılıan Mbappe (125 mln) bar.
- UFC-de kúsh synasyp júrgen Maqsat Qaısar (9-3) 27 sáýirde Las-Vegasta Anshýl Djýblımen (7-1) judyryqtasýǵa tıis edi. Alaıda Úndistannyń ókili jekpe-jekke shyǵýdan bas tartty. Atalǵan uıymnyń basshylary ony dereý 35 jastaǵy Meksıkanyń faıteri Gabrıel Benıtespen (23-11) almastyrdy. Endi Qytaıda týyp-ósken qandasymyz dál sol kúni ardager sportshymen aıqasady.
- Taıaý Shyǵysta ornalasqan birqatar memleket FIFA-dan Gaza sektorynda áskerı operasııa júrgizip, beıbit turǵyndardy qynadaı qyrǵany Izraıldi halyqaralyq dodalardan shettetýdi ótinip jatyr. Sondaı talap qoıǵandar qatarynda Saýd Arabııasy men BAÁ bastaǵan 12 el bar. Olar atalǵan uıymnyń músheligindegi barlyq 211 ulttyq jáne alty aımaqtyq fýtbol federasııalarynan qoldaý surap, osy mátinde arnaıy hat joldady.
- Ekinshi orta salmaqtaǵy absolıýtti álem chempıony Saýl «Kanelo» Alvares 2023 jyldyń qorytyndysy boıynsha eń kóp tabys tapqan kásipqoı boksshylardyń kóshin bastady. Meksıkalyq marǵasqanyń esepshotyna byltyr 66 mln dollar aýdaryldy. Barlyq sportshynyń qosa eseptegende, mol oljaǵa kenelgender tiziminde «Kaneloǵa» 17-oryn buıyrdy. Sondaı-aq TOP-5 bylǵary qolǵap sheberleri qataryna Entonı Djoshýa (55 mln), Djeık Pol (47 mln), Djervonta Devıs (42,5 mln) jáne Raıan Garsııa (40,5 mln) endi.
