Týrızm jáne sport mınıstri Ermek Marjyqpaev ótken jyldyń nátıjeleri men bıyl atqarylatyn sharýalar jospary týraly aıtyp berdi. Ol elde sportpen shuǵyldanatyndar qatary turaqty túrde ósip jatqanyn atap ótti. 2023 jyly olardyń sany 510 myń adamǵa kóbeıgen. Alaıda salada nazar aýdararlyq máseleler de bar. Salany damytý úshin jańa kózqaras kerek. Ásirese buqaralyq sportty dáripteýge qatysty. О́ńirler bıýdjetten bóletin qarajat kóleminiń jetkiliksiz ekeni aıtyldy.
«Halyqaralyq tájirıbege saı buqaralyq sportty damytý úshin mektepterden bastap, egde jastaǵylarǵa deıin arnaıy sporttyq lıgalardy jandandyrý kerek. Ozyq elderdiń tájirıbesi balalar arasyndaǵy buqaralyq sport bolashaq chempıondardyń negizi ekenin kórsetedi. Bizde ázirge biryńǵaı júıe joq. Demek buqaralyq sportty damytýdyń alǵashqy kezeńinen-aq aqsap turmyz», dep atap ótti Tamara Dúısenova.
Osy oraıda mınıstrlik pen oblys ákimderine barlyq kezeńdegi sporttyq lıgalardy maqsatty túrde damytý jumystaryn qolǵa alý tapsyryldy. Bul iske salalyq mınıstrlikter, mektepter, kolledjder, joǵary oqý oryndary, medısınalyq ortalyqtar men eńbek ujymdary atsalysýy shart.
Vıse-premer balalar men jasóspirimder sport mektepterin qarjylandyrý týrasynda da sóz qozǵady. Bul baǵytta jalpy bilim berý oshaqtary sekildi jan basyna shaqqandaǵy normatıvterdi engizý jaǵyn qarastyrý qajettigi aıtyldy. Odan bólek 18 jasqa deıingi balalarǵa arnalǵan sporttyq úıirmelerge «vaýcherler» usyný júıesin retke keltirý maqsaty tur. Qarastyrylǵan qarajatty tıimdi jumsaý úshin «bir bala – bir vaýcher» qaǵıdatyn qoldaný kózdelgen.
Joǵary jetistikter sportyn qarjylandyrý modeli de qaıta qarastyrýdy qajet etedi.
«Ulttyq qurama komandalaryna rezerv daıyndaıtyn sporttyq uıymdarymyz qazir olımpıadalyq emes sport túrlerine baǵyt alǵanyn moıyndaýymyz kerek. Bizde jazǵy olımpıadalyq oıyndar tizimine engen 45 túrli sportqa basymdyq berilgen. Olardyń qataryn azaıtyp, qalǵanyn damytýǵa mán berýmiz kerek. Bul tusta tańdaý ǵylymı turǵyda negizdelip, elimizdiń ereksheligin eskerýi qajet», dep atap ótti vıse-premer.
Sondaı-aq Tamara Dúısenova saladaǵy kásibı kadrlar jetispeýshiligine de mán berdi.
«Sporttyq dáriger men psıhologter, dıetolog, nýtrısıolog, sporttyq zańger sekildi mamandar joqtyń qasy. Deneshynyqtyrý jáne sport salasyndaǵy kadr jetispeýshiligi máselesin sheshý úshin qajettiligi turǵysynan saraptama jasap, qajet bolǵan jaǵdaıda olardy daıyndaýǵa memlekettik tapsyrysty kóbeıtý kerek», dedi Tamara Dúısenova.
Vıse-premer pikirinshe, oqý oryndary daıyndaǵan kadr sany emes, bilim berý mekemesin aıaqtaǵan soń mamandyǵy boıynsha qanshasy jumys isteıtini týraly málimettiń mańyzy artyp keledi. Sondaı-aq bilim ordasynan túlep, sporttyq mansabyn jalǵastyrýǵa nıettilerdi yntalandyrý máselesi de mańyzǵa ıe. Ol kadrlyq quramnyń sapasyn jaqsartý úshin qajet. Sebebi quzyrettilik, is-tájirıbe men meńgerilgen bilim qosylsa, maman bapkerlik jumysty baǵalap qana qoımaı, sportshylardy daıyndaýdyń jeke ádistemesin ázirlep, olardy jattyqtyrý josparyn sapaly qura alady.
«Akkredıttelgen respýblıkalyq jáne aımaqtyq sport federasııalary tóreshilerdi daıyndaýǵa tıis. Sondaı-aq halyqaralyq arenada qazaqstandyq tóreshiler korpýsy ókildikterin kóbeıtý arqyly sport túrleri boıynsha halyqaralyq federasııalarmen baılanys ornatý jumysyn kúsheıtý kerek», – dedi Tamara Dúısenova.
Bıyl Parıjde tórtjyldyqtyń basty dodasy Olımpıada jáne Paralımpıada oıyndary ótedi. Vıse-premer keıingi jyldardaǵy nátıjelerge mán berip, ulttyq qurama komandalarynyń sportshylaryna sapaly daıyndalý úshin memleket tarapynan qajetti jaǵdaı jasalǵanyn, sondyqtan jankúıerler úzdik nátıje kútetinin tilge tıek etti.
