Foto: polisia.kz
«Ishki ister organdarynda qyzmettik-izdestirý ıtteri iz kesý, patrýldik, esirtki jáne jarylǵysh zattardy izdeý baǵyttary boıynsha qyzmet atqarady. Tórt aıaqty kómekshiler qylmystardy ashýda keńinen qoldanylady. Jaqynda ǵana Aqtóbe oblysynda avtokólikti tekserý kezinde qyzmettik-izdestirý ıtimen shamamen 60 kg esirtki tabylyp, tárkilendi. Olar qylmyskerler men joǵalǵan adamdardy, balalardy tabýǵa kómektesedi», delingen habarlamada.
Máselen, 16 qańtarda Qaraǵandyda úshinshi synyp oqýshysy joǵaldy, ózimen birge uıaly telefony bolmaǵan. Alaıda ıt dál sol kúni ıis izderi arqyly balany taýyp aldy.
«Esirtki kontrabandasynyń faktilerin boldyrmaý maqsatynda memorandým sheńberinde turaqty negizde «Qazposhta» fılıaldarynda poshta jóneltimderi tekseriledi. Buǵan qosa, kınolog mamandarmen áýejaı men vokzaldarǵa, poıyzdarǵa tekserister júrgiziledi», dedi IIM esirtki qylmysyna qarsy is-qımyl departamenti kınologııalyq qyzmet bóliminiń bastyǵy Almas Kúntýov.
