Bul is-sharaǵa tanymal dızaınerler men sán áleminiń ókilderi qatysty. Sonymen qatar AQSh-ta turyp jatqan qazaq dızaıneri, kásipker Anelııa Álim óz shyǵarylymyn Nıý-Iorktiń sánqoı turǵyndaryna usyndy.
«NYFW-2024» sán kórsetiliminde uıymdastyrýshylardyń arnaıy shaqyrtýymen Nıý-Iorkte turatyn qazaqtyń kásibı estrada-djaz ánshisi Gúlzar Ǵabdrahman Qazaqstan Respýblıkasynyń Ánuranyn oryndap, «New York, New York» ánin shyrqady.
«Álemge áıgili óner juldyzy Frenk Sınatranyń repertýaryndaǵy «New York, New York» ánin alǵash ret Nıý-Iorkte ótken «West Park International Music Festival-2022» Halyqaralyq baıqaýynda oryndaǵan bolatynmyn. «NYFW-2024» sán kórsetiliminiń uıymdastyrýshylary meımandarǵa osy ándi tartý etýimdi jáne elimizdiń Ánuranyn oryndaýymdy surap, arnaıy shaqyrtý jiberdi. Azýyn aıǵa bilegen AQSh-ta, Nıý-Iork qalasynyń tórinde qazaqtyń ánin shyrqaý jáne mádenıetin kórsetý – men úshin úlken mártebe», dedi Gúlzar Ǵabdrahman.
Aıta ketsek, Gúlzar Ǵabdrahman 2022 jyldyń maýsym aıynda AQSh-tyń áıgili konserttik zaldarynyń biri «Carnegie Hall»-da ótken «Viva music Carnegie Hall» atty Halyqaralyq óner dodasynda Qazaqstan atynan 1-oryndy ıelense, 2022 jyldyń qarasha aıynda Nıý-Iork qalasynda ótken «West Park International Music Festival» án baıqaýynda 20 amerıkalyq óner maıtalmany arasynan top jaryp, gran-prı ıegeri atanǵan bolatyn. Sonymen qatar ol Londonda ótken Halyqaralyq «Albıon juldyzdary-2019» óner baıqaýynyń jeńimpazy, Qazaq Ulttyq óner ýnıversıtetiniń túlegi, Máskeý memlekettik mádenıet ınstıtýtynyń óner magıstri, «Gúlzar Ǵabdrahman estrada mektebiniń» negizin qalaýshy.
