Foto: akorda.kz
«8 naýryz – kóktem merekesi. Bul – sulýlyqtyń, meıirim men jylýlyqtyń sımvolyna aınalǵan mereke. Biz er-azamat bolyp, sizderdi joǵary baǵalaımyz, qurmetteımiz jáne jaqsy kóremiz. Názik jandarǵa degen bizdiń yqylasymyz, iltıpatymyz árdaıym erekshe. Jalpy, áıeldi qurmetteı bilgen qoǵamdy mádenıetti, órkenıetti qoǵam deýge bolady. Dana halqymyz qashanda anasyn ardaqtap, arýlaryn syılaı bilgen. Qyzdaryn qadirlep, tórine shyǵarǵan. Bul – ejelden qanymyzǵa sińgen asyl qasıet», dedi Qasym-Jomart Toqaev.
Memleket basshysy eldiktiń júgin er-azamattarmen qatar kóterip, adal eńbek etip júrgen áıelder qaýymyna alǵys aıtty. Sondaı-aq memleket tarapynan olarǵa árdaıym qoldaý kórsetiletinin jetkizdi.
«Meniń bastamammen ókildi bılik salasynda sizderge arnaıy kvota bólindi. Qazirgi tańda Parlament pen máslıhattardaǵy áıelderdiń úlesi artty. Bul baǵyttaǵy jumys jalǵasa beredi. Qyz-kelinshekter Otanymyzdy damytýǵa eleýli úles qosyp jatyr. О́z kásibin dóńgeletip júrgen belsendi áıelderimiz az emes. Sondaı-aq óndiriste, ǵylymda jáne sportta tabysqa jetken arýlarymyz kóp. Qazaqstandaǵy ustazdardyń basym kópshiligi – áıelder. Sizder jas urpaqty otanshyldyqqa, bilimpazdyqqa, eńbekqorlyqqa baýlyp júrsizder. Ult saýlyǵyn jaqsartýǵa zor eńbek sińirip kelesizder. Qazaqstannyń kórkeıýine eleýli úles qosyp júrgen osyndaı jandar zor qurmetke laıyq. Bul – keremet úrdis», dedi Prezıdent.
Saltanatty jıynda Memleket basshysy «Arý-Ana» úzdik áıelder jobasy baıqaýynyń jeńimpazdaryn marapattady. Bul joly marapat túrli salada áleýmettik mańyzy bar jobalardy júzege asyryp, azamattyq qoǵamnyń damýyna eleýli úles qosyp júrgen qyz-kelinshekterge alty nomınasııa boıynsha tabystaldy.
«Arý-Ana» baıqaýynyń jeńimpazdary:
- «Aýyl áıelderin damytýǵa arnalǵan úzdik joba» nomınasııasy boıynsha – Elshibaeva Baqytgúl Qazezbaıqyzy;
- «Ǵylym salasyndaǵy úzdik joba» nomınasııasy boıynsha – Shakýlıkova Gúlzada Táńirbergenqyzy;
- «Azamattyq sana-sezimdi damytý baǵytyndaǵy úzdik joba» nomınasııasy boıynsha – Ahmedjanova Álııa Serikbolqyzy;
- «Ulttyq mádenı murany nasıhattaý baǵytyndaǵy úzdik joba» nomınasııasy boıynsha – Mıhalıova Anastasııa Anatolevna;
- «Agrobıznes salasyndaǵy úzdik joba» nomınasııasy boıynsha – Arqashbaeva Botagóz Mahambetqalıqyzy;
- «Kreatıvti ındýstrııa salasyndaǵy úzdik joba» nomınasııasy boıynsha – Edilbekova Mádına Edilbekqyzy;
Saltanatty jıynnan keıin Memleket basshysy Qasym-Jomart Toqaev 8 naýryz – Halyqaralyq áıelder kúnine arnalǵan «Áıelmen álem ádemi» atty merekelik konsertti tamashalady.
