Foto: parlam.kz
Depýtattyń aıtýynsha, Ulytaý oblysyna issaparmen baryp, sonda kórgen-bilgen biraz másele osy minberde baıandalǵanymen, «qolǵa alynady» degen jaltarma jaýaptar berilgen.
«Naqty sheshim joq jerde másele qordalana beredi. Ult uıasy – Ulytaý oblysyn qarqyndy damytý kerek degen Memleket basshysynyń tapsyrmasy tusynda jaıbasarlyqqa salyný jón bolmas», dedi depýtat.
Depýttattyń sózinshe, kóktem – qurylystyń naǵyz qyzatyn, ári qolaıly ýaqyty. Jobalyq-smetalyq qujattamamen aınalysyp júrgende, jol salýdyń maýsymy ótip ketip jatyr.
- «Qyzylorda-Jezqazǵan» jolynyń jaıy maǵan bala kezden tanys. Bul másele sol kezde ózekti edi, qarap tursańyz, qansha jyl ótse de, «baıaǵy jartas – sol jartas». Atalǵan jol boıynsha merdiger kompanııalardyń ótinimderi áli baǵalaný satysynda tur. Qujattardyń rásimdelýi «Gosekspertıza» men «QazAvtoJol» arasynda ilgeri-keıin dopsha domalap júr. Al «Jezqazǵan-Qaraǵandy» tas jolyna qatysty merdigerlik kompanııalardy anyqtaý áli josparlanyp otyrǵanǵa uqsaıdy. Demek, naqty iske qashan kóship, qurylystyń qashan bastalatyny belgisiz, - dedi Qaraqat Ábden.
Onyń pikirinshe, halyq óńirlik basshylyqtyń ýaqytyly qımyldamaýyna, jaıbasarlyǵyna narazy, biraq atalǵan baǵyttaǵy avtomobıl joldarynyń salynýy jáne baqylanýy oblys ákimdigine emes tikeleı Kólik mınıstrligine qaraıdy. Atalǵan vedomstvo basshylary ótinimderdiń qaralýyn, baǵalanýyn, rastalýyn, qarjynyń bólinýin qatań baqylaýy kerek.
«Talap bolý kerek. Suraýy bolmasa istiń máni ketip qalady. Únemi qadaǵalansa, bir qozǵalys bolary anyq. Áıtpese, bul tas joldar qyrshyn ketken taǵdyrlardyń «eskertkishine» aınalǵany qashan?», dedi depýtat.
Qaraqat Ábdenniń aıtýynsha, taǵy bir jol – «Jezqazǵan-Qaraǵandy» tasjoly – keńestik kezeńnen kúrdeli jóndeý kórmegen, jıekteri ábden mújilip, tarylyp barady. Depýtat usynǵan derekterge sáıkes, dál osy jolda 2023 jyly 129 jol-kólik oqıǵasy tirkelip, 167 adam dene jaraqatyn alǵan, 37-si qaza tapqan. Al osy jyldyń 2 aıynda 23 jol-kólik oqıǵasy bolyp, 37 adam jaraqattanyp, 2 adam kóz jumǵan.
«Úshinshi quryltaı ótkende Prezıdent Qasym-Jomart Toqaev: «Jol salý jáne ony jóndeý jumystary ekonomıkanyń damýyna tyń serpin beredi», degen edi. Jol bolmasa, qandaı serpin, qandaı damý bolady? Jolymyzdyń túri anaý bolsa, qandaı qarqyndy ekonomıka, qandaı tabysty týrızm kútemiz? Halyqtyń ál-aýqaty osy jolǵa baılanysty. Oblysaralyq joldardyń sapasyzdyǵy óńirdiń damýyna, ınvestısııanyń tartylýyna kedergi bolyp tur, sondaı-aq jol tasymalynyń qıyndyǵyn sebep qylyp, azyq-túlik te qymbattaıdy. Bul taǵy qarapaıym halyqtyń qaltasyn qaǵatyny belgili», dedi Q.Ábden.
Osy oraıda depýtat «Qyzylorda-Jezqazǵan», «Qaraǵandy-Jezqazǵan» tas joldarynyń salynýy men jóndelýine saraptama jasalyp, naqtylanǵan jumys josparyn berýdi surady.
«Sondaı-aq jumys jospary boıynsha bul isti qadaǵalaýdy nazarǵa alýdy suraımyz», dep sózin túıindedi «Aýyl» fraksııasy partııasynyń depýtaty.
