Foto: vıdeoskrın
Inbusiness.kz saıtynyń jazýynsha, marqumnyń ápkesi Keremet Aryzbekova inisi men kelininiń qarym-qatynasy óte jaqsy bolǵanyn, ekeýi bir-birin qatty jaqsy kórgenin aıtty.
«Inim men kelinimniń urys-kerisin kórmegenmin. Ekeýi bir-birin qatty jaqsy kóretin. Baqtııar tańnan keshke deıin jumysta júretin. Avtoservıste kólikterdiń motoryn jóndeıtin, arasynda taksıst bolyp qosymsha aqsha tabatyn. Kelinim bala tárbıesimen úıde otyrdy. Jumys istep kórgen emes. Kelinimniń psıhologııalyq aýytqýy bar ekenine senbeımin», dedi marqumnyń ápkesi.
Keremet inisiniń qaıtys bolǵanyn 11 tamyzdan 12 tamyzǵa qaraǵan túni saǵat 01:25 shamasynda quzyrly organ qyzmetkerlerinen bilgenin aıtty.
«Ol máıitti 9, 10, 11 kúnderi úıde saqtaǵan. Denesin tapqan kezde men de barmaq boldym. Biraq maǵan eshkim ruqsat bermedi. Sotqa barǵanda sondaǵy bas maman meniń kim ekenimdi surady. Jábirlenýshi taraptanmyn dep edim «sorpaǵa da olaı týramaıtyn shyǵar» dedi. Sóıtsem, deneni bólshektep tastapty. Bir aıaǵyn ǵana shaba almaǵan, basqasyn bólshektep tastapty. Bir aıaǵy tórkin jaǵynan tabyldy. Bul qylmysty kelinim bir ózi istedi dep oılamaımyn. Baqtııardyń dene bólshekteri Keles ózeninen tabyldy. О́zen meniń úıime jaqyn ornalasqan», dep qosty marqumnyń ápkesi.
Aıta ketsek, Qundyz kúıeýin óltirgen soń denesin bólshektep, bóshkege salyp, keıin ózenge aǵyzyp jibergenin buǵan deıin habarlaǵan edik. Oǵan kórshisi kómektesken bolyp shyqty. Alaıda kórshisi bóshkede Baqtııardyń máıiti jatqanyn bilmegen.
«11 tamyz kúni túngi saǵat 00:00 men 01:00 arasynda Qundyz kelip: «Rýslan, turshy. Qoıdyń eti bar edi, júnimen. Sasyp ketipti. Aparyp tastaý kerek» dedi. Men Baqtııar urysatynyn aıtyp, barmaıtynymdy aıttym. Qoımaǵan soń kólikti qyzdyryp, júk salǵyshty ashtym. Jaǵymsyz ıis shyǵyp turdy. Emýlsııanyń shelegi men eki bóshke bar eken. Bóshkelerdi maǵan ashtyrǵan joq. Olardy salyp, ózenge kelip, laqtyrdyq. Al bóshkeniń ishinde qoı emes, Baqtııardyń máıiti ekenin úıge kelgende bildim. Úıge barsam polısııa quzyrly organdar júr eken. Solar aıtty», dedi marqumnyń kórshisi Rýslan Hasanov.
Eske salaıyq, oqıǵa ótken jyldyń 9 tamyzynda bolǵan. Erli-zaıyptylardyń ortaq nekesinen 3 bala bar. Qylmysqa barǵan 34 jastaǵy kelinshek áleýmettik jelide, ásirese TikTok-ta belsendi bolǵan. Al Qundyzdyń týystary marqum áıelin jıi uryp, qorlyq kórsetkenin alǵa tartty.
