Foto: vıdeodan alynǵan kadr
Tengrinews.kz oqıǵa úsh kún buryn bolǵanyn jazdy. Tóbeleskender 7-9 synyp oqýshylary bolyp shyqty. Beınejazbada bir jasóspirimniń kelesi balany aıaýsyz uryp, tepkilegeni túsirilgen. Al úshinshi bala jaǵdaıdy baıandaǵan.
Beınejazba quzyrly organnyń nazaryna ilikken.
Túrkistan oblystyq polısııa departamenti beınejazbadaǵy jasóspirimderdiń jeke basy anyqtalyp, polısııa bólimshesine jetkizilgenin habarlady. Sondaı-aq qajetti saraptamalar taǵaıyndalyp, janjaldyń sebepteri anyqtalyp jatyr. «Buzaqylyq» baby boıynsha qylmystyq is qozǵalyp, tergeý bastaldy.
«Jábirlenýshi bala anasymen birge turady. Ata-anasy ajyrasqan. Kúdiktiler sol aýyldyń turǵyndary, 7-9-synyp oqıdy. Janjalǵa qatysýshylardyń ata-analary bala tárbıeleýdegi mindetterin oryndamaǵany úshin jaýapqa tartylady. Aýdan ákimdigi janyndaǵy arnaıy komıssııa otyrysynda bilim berý mekemeleriniń basshylary men muǵalimderdiń jaýapkershiligi qaralady. Is oblystyq ishki ister departamenti bastyǵynyń baqylaýynda», delingen Túrkistan oblystyq polısııa departamentiniń baspasóz qyzmeti taratqan habarlamada.
