Depýtat Muqash Eskendirov memlekettik satyp alý rásimderine baılanysty eskertýler óńirlerde jıi qoıylatyn suraqtardyń biri ekenin jasyrmady.
«Bul másele kásipkerler men ákimshilerdi alańdatady, al sheshim bolmaǵan jaǵdaıda adamdardyń ómir sapasyna tikeleı áser etedi. Uzaq qurylys, sátsiz konkýrstar, uzaq jáne shýly sot prosesteri aýrýhanalardy kúrdeli jóndeýge, jańa mektep salýǵa, áleýmettik qyzmetter kórsetýge múmkindik bermeıdi. Keıde, ýaqtyly jáne sapasyz ótkizilgen konkýrstar mańyzdy ınfraqurylym nysandarynyń jumysyn tejeıdi», dep túsindirdi Muqash Eskendirov.
Aıta keteıik, «Memlekettik satyp alý týraly» jańa zań jobasy Memleket basshysynyń memlekettik satyp alýdyń sapaly jańa júıesin qurý jónindegi tapsyrmasyn iske asyrý maqsatymen ázirlendi.
Jobanyń mańyzdy jańashyldyqtary:
- konkýrstardyń baǵalyq emes krıterıılerin kózdeıtin satyp alynatyn taýarlardyń sapasyn arttyrý jónindegi normalar;
- memlekettik aqparattyq júıelerdiń obektıvti derekterine negizdelgen ónim berýshilerdiń reıtıngin baǵalaýdaǵy tásilderdi ózgertý;
- jetkizýshiler men ákimshilerdiń jaýapkershiligin arttyrý;
- shaǵymdaný rásimine ózgerister engizý;
- memlekettik satyp alýdy ótkizý merzimin eki esege qysqartý;
- otandyq taýar óndirýshilerdi qoldaý jáne memlekettik satyp alýlarda jergilikti qamtýdy arttyrý boıynsha aıtarlyqtaı sharalar paketi.
Odan bólek áleýmettik, ekonomıkalyq jáne ekologııalyq aspektilerdi eskere otyryp, taýarlardy, jumystardy, kórsetiletin qyzmetterdi satyp alýǵa negizdelgen «Turaqty memlekettik satyp alý» ınstıtýtyn engizý usynyldy.
«Turaqty memlekettik satyp alýdy» engizý aqshany ońtaıly jáne tıimdi jumsaýǵa, otandyq óndirýshilerdi, sondaı-aq múgedek adamdardy qoldaýǵa, qorshaǵan ortany qorǵaýǵa baǵyttalǵan.
Sondaı-aq depýtattar jergilikti qamtý úlesin arttyrýǵa baǵyttalǵan qosymsha normalardy usyndy. Usynystardyń biri boıynsha offteık kelisimsharttary boıynsha óndiriletin ónimdi bir kózden satyp alýǵa bolady.
О́ńirlik jetkizýshilerdi qoldaý maqsatynda depýtattar qosalqy merdigerlik jumystar kólemine 30% lımıt belgileýdi usyndy.
Zań jobasy boıynsha jumys ekinshi oqylymǵa deıin jalǵasady.
