«Sapaly aýdıtorııany qamtıtyn baspasózde, sonyń ishinde óńirlik basylymdardy damytý – kókeıkesti másele. Memleket tarapynan BAQ salasyn damytýdy qoldaý baǵytynda birqatar is-sharalar atqarylyp jatyr. Búgingi forým da Mádenıet jáne aqparat mınıstrligi qolǵa alǵan keshendi sharalardyń úlken bir bóligi. Byltyr elordada ótken alǵashqy forým búgin Almatyda jalǵasyn taýyp otyr. Forýmda merzimdi basylymdardy tanymal etý, oqyrman aýdıtorııasyn keńeıtý, baspasózdi nyǵaıtýda áleýmettik jeliniń múmkindikterin paıdalaný, sonymen qatar, balalar basylymdary, basylymdarda sapaly kontentti arttyrý máseleleri talqylanady», dedi Qambar Jumaǵalıuly.
Forýmnyń plenarlyq otyrysyna Mádenıet jáne aqparat mınıstrligi Aqparat komıtetiniń tóraǵasy Meıirlan Rahanov, «Jas alash» gazetiniń bas redaktory Almas Núsip, «Mysl» jýrnalynyń bas redaktory Asyl Saǵymbaev, fılologııa ǵylymdarynyń doktory Orynaı Jubaeva, «Dat» gazetiniń bas redaktory Qutmaǵanbet Qonysbaev, «Kýrsıv» gazetiniń shef redaktory Tatıana Nıkolaeva, «Kazahstanskaıa pravda» gazetiniń fototilshisi Iýrıı Bekker qatysyp, tilshiler kásibiniń mańyzdy qyrlary týraly áńgimeledi.
«BAQ – qoǵam men bılik arasyndaǵy altyn kópir, qulaǵy kózi. Sondyqtan memleket aqparat quraldarynyń erkin ári sapaly jumys isteýi úshin árqashan qoldaýyn kórsetedi. О́ńirdegi halyqtyń kóńil kúıi tilshiler jetkizetin aqparattyń sapasy men synyna baılanysty ekeni belgili. Eki kúndik forým alys aımaqtardan kelgen aqparat ókilderi úshin jemisti ári tıimdi bolady dep senemin», dedi Aqparat komıtetiniń tóraǵasy M.Rahanov.
Internet rýsýrstary men áleýmettik jelidegi aqparattar aǵyny arasynda basylymdardy básekege qabiletti etip, óz aýdıtorııasyn saýatty saraptama, zerdeli zertteýlermen sýsyndatyp, paıdaly aqparatpen qamtamasyz etý – aımaqtyq medıanyń kún saıyn qaýzaıtyn máselesi. Forýmnyń aldaǵy otyrystarynda spıkerler baspa basylymdaryn tanymal etý men taratýdyń aımaqtyq qyrlaryn, salalyq jýrnalıstıkany damytýdy, baspa basylymdaryn jetildirýdiń jańa tásilderin talqylaıdy. Ashyq pikirtalasta merzimdi basylymdardyń tynys-tirshiligi týraly oılar sarapqa salynady.
ALMATY
