Turmystyq zorlyq-zombylyq – qoǵamnyń áleýmettik-ekonomıkalyq jáne áleýmettik-mádenı problemasy. Zańnyń qabyldanýy qoǵamdy silkindirip, zorlyq-zombylyqqa tózbeýshilikti yntalandyrýǵa tıis. Bul zańnama jazalaý ǵana emes, aqparattyq-aǵartýshylyq fýnksııalardy da atqarady.
Qujatta kámeletke tolmaǵandarǵa qarsy qylmystar úshin jaza qatańdatylǵan. Adam óltirý, zorlaý, jynystyq sıpattaǵy zorlyq-zombylyq, kámeletke tolmaǵandarǵa qatysty jynystyq qolsuǵýshylyq, jeke adamǵa qarsy aýyr qylmystar úshin ómir boıy bas bostandyǵynan aıyrý jazasy engizilgen. Qabyldanǵan zańda densaýlyqqa qasaqana jeńil zııan keltirý, dene jaraqatyn salý, ózin-ózi óltirýge ıtermeleý jáne oǵan yqpal etý áreketteri qylmystyq jaýapkershilik júkteıdi. Kámeletke tolmaǵandarǵa qatysty jasalǵan bul áreketter úshin uzaq merzimge bas bostandyǵynan aıyrý jazasy qarastyrylǵan.
Qasaqana jasalǵan densaýlyqqa zııany ortasha áreketter úshin bas bostandyǵynan aıyrý merzimi ulǵaıtyldy. Azaptaý isi boıynsha 7 jylǵa deıin bas bostandyǵynan aıyrý túrindegi eń joǵary jaza qarastyrylǵan. Sondaı-aq zańda ata-analardyń balalardyń qaýipsizdigin qamtamasyz etý jaýapkershiligin kúsheıtýge de basa mán berilgen.
Alǵash ret zańnamalyq deńgeıde áıel men balanyń quqyqtaryn qorǵaý, sondaı-aq otbasyn qoldaý ortalyqtaryn qurý úshin otbasy máseleleri boıynsha 111 baılanys ortalyǵynyń jumys isteýine quqyqtyq negiz jasalǵanyn atap ótken jón.
Jańa zańnyń oryndalýyn keńinen talqylaýǵa bastamashylyq etýimiz kerek. Ár azamattyń memleket otbasy músheleri arasyndaǵy turmystyq zorlyq-zombylyqty qoldamaıtynyn túsindirý mańyzdy. Biz zorlyq-zombylyqtyń barlyq túrine «joq» dep aıtýymyz kerek. Bul máseleni nazardan tys qaldyrmaýymyz qajet. Zańnyń qabyldanýy qazirgi qoǵamnyń qanshalyqty kemeldengenin, zorlyq-zombylyqty qabyldamaıtynyn kórsetedi.
Azıza ShО́JEEVA,
«TechnoWomen» KeU basqarma tóraǵasy
