Uzaq jyl boıy Almaty qalasynda eńbek etken ol birshama ýaqyt buryn altyn besik aýylyna oralýǵa bekinipti. Kásip bastap, tabysqa kenelýdi maqsat tutqan azamat ótken jyly 1 mıllıon 380 myń teńge qaıtarymsyz grant alyp, bir sotyq jerge qulpynaı ekken. Alaıda jylyjaıda jaıqalǵan qulpynaıy aýyldastarynan artylmaǵan. Bir sózben aıtqanda, naryqqa shyǵarý úshin qazirgi jylyjaıynyń aýmaǵy aıtarlyqtaı az bolyp tur.
«Qandaıda bir kásipti ıgeremin degen azamatqa memleket tarapynan qoldaý kóp qoı. Qazirgi kezde bılik aýyl adamdaryna aıryqsha nazar aýdaryp jatqany málim. Sol úshin de týǵan aýylyma qaıta oraldym. Alysqa ketip nápaqa izdegenshe, aýylǵa kelip tirlik bastaýdy maqsat tuttym. Izdenistiń izine túsý arqyly jańa bir isti bastaǵan jaıymyz bar. Qulpynaıdy ósirý men úshin esh qıyndyq týdyrǵan joq. Italııanyń «klerı» tuqymyn kórshi óńirden ákelip ósirdik.
Shynyn aıtsam, qulpynaıdy naryqqa shyǵarý úshin bir sotyq jerge ornalasqan jylyjaı azdyq etedi eken. Is barysynda osyǵan anyq kózim jetti. Saryaǵashtyq azamattar kem degende 4-5 sotyq jerge ornalastyrǵan jón ekenin beker tuspaldamapty. Alaıda men bul jumystyń basy bolǵandyqtan, aqyryn júrip anyq basqandy jón sanadym. Nátıjesinde, biz ósirgen qulpynaı aýyldaǵy aǵaıynnan artylmady. Jergilikti jurt edel-jedel satyp alyp jatty. Osyǵan qarap-aq qulpynaı ósirý jaqsy bıznes ekenin túsinýge bolady», deıdi Ermuhan Ájiǵat.
E.Ájiǵattyń aıtýynsha, kásipti órkendetý úshin qosymsha qarajat kerek. Ol úshin árıne, nesıe alýǵa týra keledi. Alaıda jańadan kásip bastaǵan azamattar jeńildetilgen kómekke qol jetkizgisi keletini anyq. Sol arqyly bastaǵan isiniń aıasyn keńeıtýge, jergilikti azamattardy jumysqa tartýǵa múmkindik týmaq.
«Birer jyl buryn bizdiń oblysta bastalǵan qanatqaqty joba qazir elimizdiń kóptegen óńirinde iske asyrylyp jatyr. «Aýyl amanaty» degen ataýymen aýyldyqtardy jarylqaı bastaǵan sol joba bizdiń aýylǵa jetpeı turǵan jaıy bar...
Shynyn aıtqanda, biz de eki jarym paıyzdyq mólsherlememen nesıe alyp, kásibimizdi odan ármen damytqymyz, isimizdi órkendetkimiz keledi. Jergilikti atqarýshy bılik osy máselege nazar aýdarsa degen tilek kókeıde atoı salyp tur. Kásibimiz neǵurlym irilense, soǵurlym adamdar da jumyspen qamtylady. Qazir jobaǵa engen ózge aýyldarǵa qyzyǵa qarap otyrmyz», deıdi ol.
Baǵban azamat banan men mandarın sekildi ekzotıkalyq jemisti qalaı ósirý kerektigin kórshiles Túrkistan oblysynyń sharýalarynan úırenip qaıtypty. Bilikti mamandar ótkizgen trenıngke qatysyp, jańa istiń qyr-syryn jaqsylap meńgergen ol banan men mandarın ósirýdiń mańyzy zor dep esepteıdi.
«Bir jarym sotyq jerde banan men mandarın kósheti ósip tur. Buıyrtsa bul jumysymyz da oń nátıje beredi degen úmitimiz zor. Sol úshin tynbaı ter tógip jatyrmyz. Banandy ózimizde ósirip, qolymyzdan kelgenshe básekege qabiletti orta qalyptastyrsaq degen nıetimiz bar. Bul óz kezeginde halyq úshin tıimdi bolmaq. Kórshiles elderden ákelgen jemis jol-jónekeı tym qatty qymbattap ketedi. Al ózimizde ósirsek, baǵa baqylaýda bolady. Sol úshin de qamdanyp jatyrmyz. Jergilikti jurt syrttan keletin taýarǵa táýeldi bolmasa eken.
«Jalpy alǵanda jylyjaı salý – ońaı jumys emes. Buǵan anyq kózim jetip otyr. Eń bastysy jylyjaı ishindegi ylǵal men temperatýrany qalypty deńgeıde ustap turý kerek. Áýeli jerdi tereńdetip qazyp, arnaıy jylý men jaryq jelilerin júrgizýge týra keldi. Tamshylatyp sýarýdyń da óz mehnaty az emes. Ony sharýa azamattar jaqsy biledi. Barlyq isti sátimen atqarǵan soń ǵana qulpynaı ósirip, baǵymyzdy synap kórdik. Al banannyń tuqymyn Saryaǵashtaǵy jigitterden satyp aldyq. Endi bul jumysty da myqtap qolǵa alsaq degen nıetimiz bar. Qysqasy, kásipti keńeıtýdi josparlap otyrmyz», deıdi ol.
Qalaı desek te, Almatydaǵy sehtardyń birinde dánekerleýshi bolyp eńbek etken azamattyń jańa kásipti bastaýǵa táýekel etkeni kóńil qýantady. Bul qadam talaıǵa úlgi bolsa kerek. Onyń aıtýynsha, qulpynaı bıznesi qańtar aıynda qatty qyzady eken. Naryqqa shyǵarý úshin jylyjaı aýmaǵyn keńeıtýdiń mańyzy zor. Áıtpese taǵy da ol ósirgen qulpynaı aýyl turǵyndarynan artylmaıtyn sekildi. Ázirge negizgi tutynýshylary – aýyldastary. Derekke sensek, jergilikti turǵyndar aýyl azamatynan qulpynaı satyp alyp, «shokolad ishindegi qulpynaı» atanyp ketken jeńsik as daıarlap, saýdalap júr eken.
Jambyl oblysy,
Jambyl aýdany
