Foto: Batys Qazaqstan oblysy ákimdigi, gov.kz
Bıyl joǵary oqý oryndarynda oqý úshin 112 myń grant bólingen. Sondaı-aq osy jyly alǵash ret ishinara oqý aqysy bar saralanǵan granttar engizildi.
Granttardyń basym bóligi «Injenerlik, óńdeý, qurylys salalary» bilim berý baǵdarlama toptaryna bólindi, olardyń sany 19 344 grantty quraıdy. Al «Pedagogıkalyq ǵylymdarǵa» – 13 735 grant, «Aqparattyq-kommýnıkasııalyq tehnologııalar» salasyna – 10 903 grant, «Jaratylystaný ǵylymdary, matematıka jáne statıstıka» baǵytyna – 8 288 grant tıesili.
Bıyl alǵash ret ishinara oqý aqysy bar saralanǵan granttar engizildi. «Pedagogıkalyq ǵylymdar» jáne «Áleýmettik ǵylymdar, jýrnalıstıka jáne aqparat» BBBT boıynsha 150 saralanǵan granttan bólingen.
Osy jyly «Serpin» baǵdarlamasy boıynsha grant ıelengen túlekter, endi oqý bitirgesin grant aqysyn burynǵydaı 3 jyl emes 2 jyl óteıdi ári ony óteý orny 11 aımaqqa ulǵaıtylǵan.
«Granttar tiziminde 5 000 halyq tyǵyz qonystanǵan jáne batys óńirlerdiń jastaryn jetekshi joǵary oqý oryndarynda oqytý úshin maqsatty bilim berý granty bar, onyń ishinde granttar Atyraý jáne Mańǵystaý oblysy túlekterine arnalǵan. Jalpy, bakalavrıatqa túsý úshin 2024-2025 oqý jylynda 79 myńǵa jýyq grant bólindi», delingen Ǵylym jáne joǵary bilim mınıstrligi taratqan habarlamada.
Magıstratýraǵa túsýge 13 myńǵa jýyq, doktorantýraǵa túsýge 1 900 astam grant bólingen.
2024-2025 oqý jylyna arnalǵan bilim berý granttaryn bólýdiń tolyq tizimi Ulttyq testileý ortalyǵynyń saıtynda jarııalandy. Tizimdi myna silteme arqyly kórýge bolady.
