Foto: N.Baıbýlın.
Tyńdaý kezinde Memleket basshysynyń elimizdiń myqty ónerkásiptik negizin qalyptastyrý jáne ekonomıkamyz ózimizdi tolyq qamtamasyz ete alatyn jaǵdaıǵa jetý mindetin júktegeni aıtyldy. Bul rette óńdeý sektoryn jedel damytýdyń mańyzy zor.
Senat Tóraǵasy Máýlen Áshimbaev qazirgi ýaqytta elimizdiń aldynda 2029 jylǵa qaraı ulttyq ekonomıkanyń kólemin 2 esege ulǵaıtyp, ony 450 mıllıard dollarǵa jetkizý jóninde mańyzdy mindet turǵanyn atap ótti. Soǵan qaramastan óńdeýshi sektorda qordalanǵan problemalar az emes. Onyń ishinde óndiristik qorlardyń ábden tozýy, óndiris qýatynyń jetkiliksiz júktelýi, bilikti kadrlardyń tapshylyǵy, shıkizat ımportyna táýeldilik sekildi máseleler bar.
«О́ńdeý sektorynyń shamamen 40 paıyzy metallýrgııaǵa tıesili. Olar negizinen tómen deńgeıde óńdelgen ónimder, aralyq tutyný taýarlary jáne ónerkásiptik shıkizat. Shıkizattyq emes eksportqa qatysty jaǵdaı da osyndaı. Jalpy, óńdeý sektory áli kúnge deıin ımportqa táýeldi bolyp qalyp otyr. Bul ásirese, tehnologııalyq ónimderge jáne shıkizatqa qatysty ekenin aıta ketken jón. Sondaı-aq kadrlarmen qamtamasyz etý máselesi de ózekti», dedi Palata Spıkeri.
Sonymen qatar tyńdaý barysynda qatysýshylar qarjylandyrýǵa qol jetkizý máselesin talqylady. Senatorlar keshe Palata otyrysynda kásipkerlik salaǵa kredıt berý tetikterin qaraý kezinde osy túıtkildi ishinara kótergen bolatyn. Qazirgi tańda nesıeleý mólsherlemesi 22 paıyzǵa deıin jetedi. Al, bul óńdeýshi sektordaǵy kásiporyndardyń damýyna kedergi keltiretini anyq.
Is-shara kezinde otandyq shıkizattyń jekelegen túrleriniń joǵary qunyna baılanysty problemalar da sóz boldy. Bul qaıta óńdelgen ónimniń básekege qabilettiligin tómendetedi. Sondaı-aq otyrysqa qatysýshylar jetkiziletin taýarlar kólemin ulǵaıtý jáne qaıta óńdeletin ónim nomenklatýrasyn keńeıtý boıynsha jumysty kúsheıtý qajet ekenin aıtty.
Senat Tóraǵasy ónerkásip sektoryn damytý isindegi syn-qaterlerdi nazarǵa alyp, aldaǵy kezeńge arnalǵan birlesken jumystyń negizgi mindetterine toqtaldy. Palata Spıkeriniń aıtýynsha, orta bıznestegi óndirýshilerdi qoldaý jáne olardy damytý basym baǵyttardyń biri. Sondyqtan atalǵan sanattyń ereksheligin eskere otyryp, osyndaı kásiporyndardy yntalandyrýdyń jańa tetikterin ázirleý usynyldy.
«Prezıdentimiz óndiriletin ónimdi qaıta óńdeý deńgeıin arttyrý jóninde naqty tapsyrma berdi. Sonyń aıasynda óńdeý ónerkásibin memleket tarapynan qoldaýdyń qosymsha sharalaryn pysyqtaǵan jón. Osy baǵyttaǵy problemalar men kedergilerdi anyqtaý úshin salaǵa jasalǵan barlyq qoldaý sharalarynyń tıimdiligin tekserý jáne baǵalaý mańyzdy. Sonymen qatar, búgin atap ótilgendeı, óńdeý ónerkásibi úshin bilikti kadrlar daıarlaý qajet. Naryq qajettilikterine jaýap beretin mamandardy daıarlaý úshin bilim berý mekemeleri men kásiporyndar arasyndaǵy baılanysty nyǵaıtýdyń mańyzy zor. Jalpy, óńdeýshi sektordaǵy ahýaldy jaqsartý úshin memleket, bıznes, depýtattar jáne ǵylymı-bilim berý mekemeleri birlesip, keshendi ári júıeli jumys júrgizýge tıis», degen Máýlen Áshimbaev Parlament aldaǵy ýaqytta da atalǵan baǵyttaǵy mańyzdy bastamalarǵa qajetti zańnamalyq qoldaý kórsetýge daıyn ekenin tilge tıek etti.
Parlamenttik tyńdaý kezinde elimizdiń О́nerkásip jáne qurylys mınıstri Qanat Sharlapaev, О́ńdeýshi ónerkásip odaǵynyń Tóraǵasy Marat Baqqulov, Qazaqstan mashına jasaý odaǵynyń Tóraǵasy Meıram Pishembaev, Qazaqstan hımıkter odaǵynyń vıse-prezıdenti Tahmına Naǵumanova, Dúnıejúzilik banktiń sarapshysy Áset Bıjan jáne taǵy basqa sarapshylar sóz sóılep, kóterilgen máselege qatysty usynystaryn jetkizdi.
