Nıettes, tilektes qaýym. Aýyl úıdiń áńgimesi bylaı qalyp, muhıttyń arǵy betindegi bilim máselesin jiktep, jiliktep, taldap-aq jatyr. Álden soń aldymyzǵa as kelgen. Aqsaqal da aq túıeniń qarny jarylǵan kúni aıanyp qalmapty. Eki jas jigit eki shetinen ázer kóterip ákelgen uzynsha, úlken astaýdyń ústindegi býy burqyraǵan et týralyp jatyr. Súbeniń ózi bestiniń qazysyndaı. Appaq qardaı jambas jarty astaýdy alǵan.
– «Semizdikti qoı ǵana kóteredi» degen ras, – dedi Áýbákir aǵa. – Qabyrǵasyn qarashy, maı jep qoıypty, jambastyń súıegi de jiptikteı. Basqa mal bolsa kúpti bolyp, júregin maı basyp ólip qalar edi.
– Nemerem oqýǵa túskende baılaǵan isek qoı, tórt jyl jemde turdy. Búgin ózderińe buıyrypty. Oqýyn aıaqtady, endi qujattaryn bir aıdyń ishinde rásimdep keledi, – dedi Sabyr aqsaqal masattanyp.
– Bul da zamannyń ózgergeni, – dedi Áýbákir aǵa. – Keshegi keńes zamanynda bizdiń aýyldyń bir kisisi «Men barmaǵan jer bar ma, Antonovkany da kórgenmin», depti ǵoı, sonda Antonovkasy aýyldan qyryq shaqyrym jerdegi orys poselkesi. Búgin, mine, Sábeńniń nemeresi kóz kórip, qulaq estimegen Amerıkadan oqý bitirip kelip otyr.
As qaıyrardyń aldynda Sabyr aqsaqal shetin bir áńgimeniń ushyǵyn shyǵarǵan. Qaıdan tapqanyn kim bilsin, arshanyń birer kóshetin ákelip otyrǵyzypty. Kókshetaý óńirinde arsha Sandyqtaýda ǵana bar. Basqa jerde óse qoımaıdy. Sondyqtan tańsyq. Aqsaqaldyń eki-úsh jylǵy talpynysy zaıa bolǵan. Arsha kósheti qansha kútkenimen kóktemeı qoıdy. Aǵash jaıyn biletinderdiń aıtýyna qaraǵanda, kinárat topyraqtan.
Sálden keıin balalardyń biri tabaqty alýǵa ruqsat suraǵan.
– Asataıyq, – dedi Áýbákir aqsaqal. – Kóne yrym. Jol júrip bara jatqan balany topyraǵymen tatqan dámi perishtedeı qoldap, qorǵap júredi.
Astaýdyń túbindegi bir shókim qıǵashtaı tilingen baýyrdyń ústine jambastan jonyp alǵan appaq maıdy qondyrdy. Zordyń kúshimen qara kesek et tabyldy. Sóıtip, baryp alystaǵy Amerıkada bilim alyp kelgen Sabyr aqsaqaldyń nemeresin shaqyrdy. Bala bolsa aqsaqaldyń qolyna bir, dámge bir qarady. Tyjyrynǵan tárizdi. Qolmen bergen soń birtúrli jıirkenip turǵany ańǵarylady.
Endi ózi yńǵaısyz jaǵdaıǵa qalǵan Áýbákir aqsaqal jýyp-shaıyp jatyr. «Atam qazaq osylaı jegen, aıyp-shamy joq».
Kók teńizdiń ár jaǵyndaǵy mol bilimge bókken nemereniń týǵan jerdiń topyraǵynan ajyrap qalǵany ańǵarylyp tur edi. Esime álgi arsha túse bergeni.
