Fotolar: Aqorda
Prezıdentke ortalyqtyń zamanaýı medısınalyq apparattarmen jabdyqtalǵan dıagnostıka kabınetteri, nárestelerge arnalǵan qarqyndy terapııa bólimshesi jáne operasııa bólmeleri tanystyryldy.
Almaty qalasy ákiminiń orynbasary Ásem Núsipovanyń aıtýynsha, 1965 jyly negizi qalanǵan qalalyq balalar aýrýhanasy S.Asfendııarov atyndaǵy Qazaq ulttyq medısınalyq ýnıversıteti pedıatrııa kafedrasynyń klınıkalyq bazasy sanalady.
Aýrýhanada tek Almaty qalasynyń ǵana emes, búkil Qazaqstannyń balalary josparly em-dom alady. Respýblıka boıynsha tek osy klınıkada jańa týǵan nárestelerde kezdesetin asqazan artrezııasy, kóket jaryǵy (dıafragmalnaıa gryja), rahıshızıs, gastroshızıs sekildi týabitti dertterdi hırýrgııalyq jolmen emdeý tásilderi jolǵa qoıylǵan.
Sońǵy úsh jylda bul aýrýhanada emdelýshiler sany 30 paıyzǵa artqan. Sol sebepti qazir Balalar shuǵyl medısınalyq járdem ortalyǵynyń negizgi ǵımaratyn jańartý jáne rekonstrýksııalaý jospary ázirlenip jatyr. Soǵan sáıkes eski korpýstardyń bári kúrdeli jóndeýden ótkizilip, qosymsha ońaltý, otolarıngologııa, aımaqtyq oftolmologııa ortalyqtary jáne jaq-bas súıek hırýrgııasy bólimsheleri ashylmaq. Nátıjesinde stasıonardaǵy tósek-oryn sany 350-den 470-ke deıin artady. Sondaı-aq kórsetiletin medısınalyq qyzmetterdiń túri kóbeıip, halyqaralyq standarttar deńgeıindegi sapany qamtamasyz etý múmkindigi paıda bolady.
Memleket basshysy Qasym-Jomart Toqaev medısınalyq mekemeniń qyzmetine tabys tilep, 2 reanımobıl men ınteraktıvti taqtany syıǵa tartty.
