Foto: unicef.org
«Biz sizdermen, bizdiń aqyldy, talantty, úmit artqan balalarymyzben maqtanamyz! Elimizdiń betke ustar azamattary bolasyzdar dep senemin. Sizderge shyn júrekten qyzyqty da tanymdy balalyq shaq, baqyt, densaýlyq jáne amandyq tileımin», dep jazdy Bala quqyqtary jónindegi ýákil.
Dınara Bolatqyzy el azamattaryn Halyqaralyq balalardy qorǵaý kúnimen quttyqtap, balalar elimizdiń eń mańyzdy qundylyǵy ekenin atap ótti.
«Balalardy qorǵaý, olardyń quqyqtaryn qamtamasyz etý jáne qolaıly ómir súrý jaǵdaılaryn jasaý qoǵamnyń ár múshesi úshin basymdyq ekenin bárimiz túsinýimiz kerek. Balalar qaýipsizdigi men ál-aýqaty – ortaq maqsat. Ata-ana retinde balalarymyzdyń taǵdyry úshin birinshi kezekte biz jaýapty ekeninimizdi únemi este ustaýymyz kerek. Bir ókinishtisi, statıstıka balalarǵa qaýiptiń jıi tónetinin kórsetedi. Kún saıyn 3 bala terezeden qulap, ýlanýdan, jaraqattanýdan, kólik apatynan qaıtys bolyp jatyr. Zorlyq-zombylyqqa qatysty tragedııalardyń kóbin boldyrmaýǵa bolýshy edi, 70% jaǵdaıda aınaladaǵy adamdar ýaqytynda áreket etpedi», dep jazdy D.Zákıeva.
Jazba ıesi ata-analardy, eresekterdi balalarǵa sezimtaldyq pen jaýapkershilik tanytýǵa, balalardyń qorǵaýshysy bolýǵa, olarǵa qıyn jaǵdaıda kómektesýge, balalarǵa qatysty zorlyq-zombylyq pen qatygezdikti boldyrmaýǵa shaqyrdy.
«Bizdiń balalyq shaqty qorǵaýdyń ulttyq júıesinde biz bıliktiń barlyq tarmaqtarynyń, azamattyq qoǵamnyń, úkimettik emes jáne halyqaralyq uıymdardyń tyǵyz ózara is-qımyly men qoldaýyna senemiz.
Bárimiz birge balalarymyzdyń baqytty balalyq shaǵy úshin qajet nárseniń bárin jasaı alatynymyzǵa kámil senemin!», dep túıindedi Dınara Zákıeva.
