Memlekettik rámizder kúnine oraı óńirdegi eń shalǵaı jatqan Bókeı ordasy aýdanynyń ortalyǵy Saıqyn aýylynda «Meniń týym – meniń maqtanyshym» avto-velo sherýi uıymdastyryldy.
Sherýge qatysqan aýdan turǵyndary ortalyq kóshelerde kók týdy kókke jelbiretip, kópshilikti birlikke, yntymaqqa shaqyrdy. Aksııaǵa 20-dan astam kólik pen velosıpedshiler toby qatysty.
Al Oral qalasynda memlekettik mekemelerde, saýda úılerinde «Meniń týym – meniń maqtanyshym!» chellendji uıymdastyrylyp, qala turǵyndaryna jalaýshalar taratyldy.
Qaratóbe aýdanyndaǵy ortalyq saıabaqta rámizder kúnine oraı «Memlekettik rámizder – ulttyq maqtanyshym» atty saltanatty shara ótkizildi.
Alańǵa jınalǵan mekeme qyzmetkerleri, aýyl turǵyndary, belsendi jastar aldynda týtuǵyrdaǵy memlekettik tý joǵary kóterilip, jandy daýysta memlekettik gımn oryndaldy.
«Memlekettik rámizder ulttyq biregeıliktiń qalyptasý tiregi jáne árbir memlekettiń damýynyń ajyramas bir bóligi. Elimizdiń derbestigi men táýelsizdigin álemge jarııa etýshi ári memleketimizdiń búgini men bolashaǵy arasyndaǵy sabaqtastyqty jalǵaıtyn jarqyn beıne ol – Memlekettik rámizder. Ulttyń basty qundylyǵy ulttyq nyshandarmen tyǵyz baılanysty. Atap óter bolsaq, Ánuran, Eltańba, Tý bul barlyǵy memlekettik rámizderdi aıqyndaýshy kúsh. Barshańyzdy Rámizder kúni merekesimen shyn júrekten quttyqtaımyn!», dedi Qaratóbe aýdanynyń ákimi Qadyrjan Orynbasaruly jınalǵandar aldynda.
Saltanatty jıynda kóktemgi sý tasqyny kezinde qutqarý jumysyna belsendi atsalysqan birqatar jastarǵa alǵys hat tabystaldy.
Dál osy kúni Bórli aýdandyq mádenıet úıinde de «Rámizderge qurmet - elge qurmet» atty saltanatty jıyn ótti. Bórli aýdanynyń ákimi Erkebulan Ihsanov bórlilikterdi mereıli merekemen quttyqtap, el isinde eńbegi sińgen birqatar azamatqa qurmet kórsetti. Marapattalǵan azamattar qatarynda kásipkerler, bilim mekemeleriniń basshylary, quqyq qorǵaý salasynyń mamandary, qoǵamdyq birlestik ókilderi jáne jastar boldy. Barshasyna qıyn kezeńde eldiń qyzmetinde tartynyp qalmaı, ýaqytpen sanaspaı eńbek jasaǵany úshin aýdan ákiminiń alǵys haty berildi.
Eń úlken sharalar árıne, Oral qalasynda ótti. Oblys ortalyǵyndaǵy eń úlken alańda Memlekettik Tý joǵary kóterilip, saltanatty jıyn ústinde jas sarbaz ulandary Qazaqstan Respýblıkasynyń Memlekettik rámizder kúnimen quttyqtady. Barlyq bilim berý uıymdarynda merekege arnalǵan sharalar uıymdastyrylǵan.
