Foto: Turar Qazanǵapov
Búgin, 7 maýsym kúni Qazaqstan musylmandary dinı basqarmasy aldaǵy Qurban aıtqa qatysty mańyzdy málimdeme jasady.
Islam dininde qasıetti kúnder, túnder jáne aılar qamarı jyl sanaýy negizinde anyqtalady. Mundaı jyl sanaq aı fazasynyń ózgerýine qaraı esepteledi. Jańa aıdyń (hıláldyń) kórinýimen jańa aı bastalady. Qamarı aı keıde 29 nemese 30 kún bolady.
«Zýl-hıjja aıyn anyqtaý úshin zýl-qaǵda aıynyń 29-ynda aıdy baqylaıdy. Kún batqan kezde jańa aı kórinse, kelesi kúni zýl-hıjja aıy bastalǵan bolyp sanalady. Eger aýa bultty bolyp, aı kórinbese, zýl-qaǵda aıyn 30 kúnge tolyqtyrady. Osyǵan oraı, 2024 jyly 6 maýsymda jańa aıdyń kórinýine baılanysty bıyl zulhıjja aıy 7 maýsymda bastalyp, arapa 15 maýsymǵa, al qurban aıt 16 maýsymǵa saı keledi», delingen habarlamada.
QMDB Zýl-hıjja aıynyń alǵashqy on kúninde barynsha yqylaspen ǵıbadat etip, kóbirek izgi ister men jaqsy amaldar jasaýǵa tyrysý kerek ekenin eske saldy. О́ıtkeni, hadısterde sol ýaqytta oryndalǵan ıgi isterdiń saýaby eselenip jazylatyny aıtylǵan.
«Qurban aıt namazynan keıin úsh kún ishinde jaǵdaıy kelgen musylmanǵa qurbandyq shalý – mindet. Alla Taǵala qasıetti Quranda: «Rabbyńnyń razylyǵy úshin namaz oqy jáne qurbandyq shal» («Káýsar» súresi, 2-aıat) dep buıyrǵan», delingen múftııat málimdemesinde.
Buǵan deıin el azamattary 17 maýsym kúni qosymsha bir kún demalatyny habarlanǵan edi. О́ıtkeni Qurban aıttyń birinshi kúni dál osy kúnge sáıkes kelgen. Biraq QMDB merekeniń bir kún buryn – 16 maýsymda bastalatynyn habarlady.
«Búgin QMDB Qurban aıt 16 maýsymǵa sáıkes keletinin málimdedi. Demalys kúnderine saı keletin dinı merekeler jyljytylmaıdy. Sondyqtan demalys kúni aýyspaıdy, 17 maýsym - jumys kúni bolyp qala beredi», dep túsindirdi QR Eńbek jáne halyqty áleýmettik qorǵaý mınıstrliginiń baspasóz qyzmeti.
