Sýretti túsirgen – Jeńis Ysqabaı
Joǵary oqý orny men óńirdegi hımııa óndirisiniń lokomotıvi sanalatyn «Qazfosfat» JShS jáne D.Mendeleev atyndaǵy Reseı hımııa-tehnologııa ýnıversıteti birlesip qolǵa alǵan jobanyń alǵashqy túlekteri kásibı mamandardan dáris alyp, bilimin jetildirdi.
Al birer kún buryn M.H.Dýlatı atyndaǵy Taraz óńirlik ýnıversıtetinde «Mendeleev synyby» jobasynyń 10-11 synyp bitirýshilerine sertıfıkat tabystaý rásimi saltanatty túrde uıymdastyryldy. Is-sharaǵa D.Mendeleev atyndaǵy RHTÝ, «Qazfosfat» JShS qyzmetkerleri, qala mektepterindegi hımııa pániniń muǵalimderi, Dýlatı ýnıversıtetiniń oqytýshylary men stýdentteri qatysty.
Byltyrǵy qazan men bıylǵy mamyr aıy aralyǵynda tarazdyq 22 oqýshyǵa D.Mendeleev atyndaǵy Reseı hımııa-tehnologııalyq ýnıversıteti men Dýlatı ýnıversıtetiniń oqytýshylary dáris berdi. Kásibı mamandardyń tálimin alǵan bilim alýshylar joba aıasynda oqýyn támamdap, hımııa-matematıka baǵytynda bilimin ushtady.
M.H.Dýlatı ýnıversıtetiniń basqarma múshesi – strategııalyq damý jáne ınternasıonaldandyrý jónindegi prorektor Sholpan Esimovanyń aıtýynsha, hımııa ónerkásibinde naqty jobalardy júzege asyrý úshin túrli biliktiligi bar 15 myńnan astam qyzmetker qajet. Onyń ishinde 3 myńnan astam joǵary bilimdi, 2 myńnan astam orta tehnıkalyq bilimi bar jáne kásiptik bilimi bar jumysshylar kerek ekeni anyqtalǵan.
«Qazfosfat» JShS óndirisiniń artýyna baılanysty búgingi tańda 4000-ǵa jýyq maman qajettiligi týyndap otyr. Al óńirlik ýnıversıtetke hımııa ónerkásibi úshin mamandardy daıarlaý mindeti júktelgen.
Is-sharaǵa beınebaılanys arqyly qosylǵan D.Mendeleev atyndaǵy Reseı hımııa-tehnologııalyq ýnıversıteti rektorynyń mindetin atqarýshy Ilıa Vorotynsev túlekterdi quttyqtap, jyly lebizin jetkizdi. Sondaı-aq ol «Mendeleev synyby» jobasy ári qaraı jalǵasyn tabatynyn aıtty.
«Qazfosfat» JShS personalmen jumys departamentiniń dırektory Qaırat Bolatov túlekterdi jobany sátti aıaqtaýymen quttyqtady. Hımııa salasy mamandaryn mektep tabaldyryǵynan bastap daıarlaý tıimdi bastama ekenin aıtqan ol oqýshylardy ári qaraı izdenýge, tereń bilim alýǵa shaqyrdy. Q.Bolatovtyń aıtýynsha, «Qazfosfat» JShS-na qarasty zaýyttarǵa bilikti kadrlar qajet. Ol mamandar «Mendeleev synyby» túlekteri arasynan shyqsa quba-qup.
Is-shara barysynda mamandar qolynan sertıfıkat alǵan oqýshylar bolashaqta hımııa salasynyń bilikti mamany atanýǵa nıetti ekenin jetkizdi.
Taraz
