Fotolar: «AMANAT» partııasy
Astana qalasynyń jáne Qaraǵandy, Jambyl oblystary qatysýshylarynan bólek, olarǵa Almaty oblysynyń eriktileri qosyldy.
«Astana – Almaty» tasjolynyń Jambyl oblysy aýmaǵyndaǵy uzyndyǵy 224 shaqyrymdy quraıtyn ýchaskesinde «Jastar Rýhynyń» belsendileri men volonterleri jol jıeginen 10 tonnadan astam qoqys jınady. Búgin eriktiler toby Almaty oblysyna jetti. Osylaısha, bas-aıaǵy 1 myń shaqyrymnan astam jol tazartyldy.
«Biz estafetany Jambyl oblysynan qabyldap aldyq. Qazirdiń ózinde eki oblystyń shekarasynda, ıaǵnı Qansheńgel aýyly mańynda Jambyl aýdanynyń 250 turǵyny aksııaǵa qosyldy. Ári qaraı biz tazalyq jumysyn Ile aýdanynyń Aqshı aýylynda jalǵastyrdyq. Onda belsendiler men volonterlerden bólek, jergilikti turǵyndar da tazalyq jumysyn júrgizip jatyr», dedi «AMANAT» partııasy Almaty oblystyq fılıaly tóraǵasy Qýat Baıǵojaev.
Aıta keteıik, «Qaraǵandy – Balqash» tasjoly boıynan jınalǵan qoqys polıgondarǵa shyǵarylady. Bul baǵytta «QazAvtoJol» UK» AQ járdemdesip jatyr.
«Biz tazalamasaq, kim tazalaıdy? Adamdardyń ótip bara jatyp, jol boıyna qoqys tastap ketetini janyma batady. Sondyqtan osy estafetaǵa adamdardyń kóptep qyzyǵýshylyq tanytýynda tańǵalarlyq eshteńe joq dep sanaımyn», dedi Almaty oblysy Jambyl aýdany Qansheńgel aýylynyń turǵyny Baıan Nurjanqyzy.
Eske salaıyq, buǵan deıin Prezıdenttiń «Taza Qazaqstan» jalpyulttyq bastamasy aıasynda «AMANAT» partııasy ár apta saıyn uıymdastyrylatyn «Taza beısenbi» ekologııalyq aksııasyn bastaǵan bolatyn. Eldi mekenderdegi lastanǵan aýmaqtar boıynsha ázirlengen karta negizinde el aýmaǵynda jol boıyndaǵy aýmaqtardan, ónerkásiptik aımaqtardan, turǵyn aýdandardan, áleýmettik nysandardan jáne basqa da kóptegen aýmaqtardan 475 ýchaske anyqtaldy.
